عراق : سلیمانیہ میں داعش سے وابستگی کے الزام میں مطلوب شخص گرفتار

بغداد (ڈیلی اردو) عراقی کردستان کی جنرل ڈائریکٹوریٹ آف کاؤنٹر ٹیررازم نے سلیمانیہ کے علاقے بازیان میں کارروائی کرتے ہوئے داعش سے وابستگی کے الزام میں مطلوب ایک شخص کو گرفتار کرنے کا دعویٰ کیا ہے۔

ادارے کے مطابق کارروائی خفیہ معلومات کی بنیاد پر کی گئی، جس کے بعد ملزم کی نگرانی اور تفتیش مکمل کرکے متعلقہ جج کی منظوری سے اسے حراست میں لیا گیا۔

بیان میں گرفتار شخص کی شناخت عبدالمؤمن احمد صالح الرفیعی کے نام سے کی گئی ہے۔ حکام کے مطابق اس نے 2015 میں نینویٰ کے علاقے قیّارہ میں داعش سے وفاداری کا حلف اٹھایا تھا اور تنظیم کے زیرانتظام مذہبی تربیت مکمل کرنے کے بعد معاونت اور سپورٹ کے شعبے میں کام کرتا رہا۔

کردستان کاؤنٹر ٹیررازم کے مطابق ملزم نے داعش کی نام نہاد ولایت صلاح الدین کے تحت عراقی فوج اور سکیورٹی فورسز کے خلاف بعض لڑائیوں میں بھی حصہ لیا۔

ادارے کا کہنا ہے کہ داعش کی شکست کے بعد ملزم شام فرار ہوگیا، جہاں وہ کچھ عرصہ الہول کیمپ میں مقیم رہا۔ بعد ازاں عراق واپس آنے پر اسے موصل کے الحاج علی کیمپ منتقل کیا گیا، جس کے بعد وہ کردستان ریجن پہنچا اور بازیان میں رہائش اختیار کرلی۔

حکام کے مطابق گرفتاری کے بعد ملزم کو قانونی کارروائی کے لیے متعلقہ اداروں کے حوالے کردیا گیا ہے، جہاں اس کے خلاف قانون کے مطابق کارروائی کی جائے گی۔