عراق: سیکیورٹی فورسز اور داعش جنگجوؤں میں جھڑپ، 2 دہشتگرد اور ایک شہری ہلاک

بغداد(ڈیلی اردو) عراق کے شمالی شہر کرکوک کے علاقے التون کوپری میں سیکیورٹی فورسز اور داعش سے وابستہ مسلح افراد کے درمیان جھڑپ کے نتیجے میں دو دہشتگرد ہلاک جبکہ ایک کو زخمی حالت میں گرفتار کر لیا گیا۔ واقعے میں ایک شہری بھی ہلاک اور انسداد دہشتگردی کے دو اہلکار زخمی ہوئے۔

عراقی سیکیورٹی میڈیا سیل کے سربراہ سعد معن کے مطابق انسداد دہشتگردی فورس کی اسپیشل آپریشنز کمانڈ ٹو کے اہلکاروں نے خفیہ نگرانی اور معلومات کی بنیاد پر تین مشتبہ دہشتگردوں کا تعاقب کیا، جس کے دوران فائرنگ کا تبادلہ ہوا۔

سعد معن نے بتایا کہ ہلاک ہونے والے دونوں دہشتگرد خودکش جیکٹس پہنے ہوئے تھے، جبکہ تیسرا شخص انہیں نقل و حرکت میں مدد فراہم کر رہا تھا۔ جھڑپ کے دوران دونوں دہشتگرد مارے گئے، جبکہ تیسرا زخمی ہونے کے بعد گرفتار کر لیا گیا۔

ان کے مطابق کارروائی کے دوران انسداد دہشتگردی فورس کے دو اہلکار بھی زخمی ہوئے، جبکہ فائرنگ کی زد میں آکر ایک شہری ہلاک ہوگیا۔

عراقی انسداد دہشتگردی ادارے نے اس سے قبل بھی التون کوپری میں داعش کے عناصر کے خلاف کارروائی کی تصدیق کرتے ہوئے دو خودکش جیکٹس پہنے دہشتگردوں کی ہلاکت کی اطلاع دی تھی۔