عراق: جنوب نینویٰ میں داعش کی چھوڑی بارودی ڈیوائس کا دھماکا، 2 فوجی ہلاک

بغداد(ڈیلی اردو) عراق کے صوبہ نینویٰ کے جنوبی علاقے میں داعش کی چھوڑی ہوئی بارودی ڈیوائس کے دھماکے میں عراقی فوج کے 2 اہلکار ہلاک جبکہ 2 دیگر زخمی ہوگئے۔

عراقی وزارت دفاع کے مطابق واقعہ ساتویں انفنٹری ڈویژن کے 27ویں بریگیڈ کے ذمہ داری والے علاقے میں راوہ کے شمالی صحرائی حصے میں پیش آیا، جہاں فوجی اہلکار تلاشی اور سرچ آپریشن میں مصروف تھے۔

وزارت دفاع کے بیان کے مطابق کارروائی کے دوران داعش کے دور کی باقیات میں شامل ایک بارودی ڈیوائس پھٹ گئی، جس کے نتیجے میں 2 اہلکار ہلاک اور 2 زخمی ہوئے۔ زخمیوں کو فوری طور پر اسپتال منتقل کردیا گیا، جہاں انہیں طبی امداد فراہم کی جا رہی ہے۔

عراقی حکام کے مطابق ملک میں داعش کے خلاف بڑے پیمانے پر فوجی کارروائیوں کے باوجود بعض علاقوں میں تنظیم کی جانب سے ماضی میں نصب کی گئی بارودی ڈیوائسز اور دیگر جنگی باقیات اب بھی سیکیورٹی فورسز کے لیے خطرہ بنی ہوئی ہیں۔

واضح رہے کہ گزشتہ ہفتے بھی عراقی سیکیورٹی فورسز نے کرکوک کے شمالی علاقے التون کوپری میں داعش سے وابستہ 2 خودکش حملہ آوروں کو ہلاک کرنے کا دعویٰ کیا تھا۔

داعش نے 2014 میں نینویٰ کے دارالحکومت موصل سمیت عراق کے وسیع علاقوں پر قبضہ کرلیا تھا، تاہم عراقی سیکیورٹی فورسز نے بین الاقوامی اتحاد کی معاونت سے 2017 میں تنظیم کے زیر قبضہ تمام بڑے شہری علاقوں کو واپس لے لیا تھا۔