عراق: دیالیٰ میں داعش کے نعروں پر مبنی تحریریں لکھنے والا گرفتار

بغداد(ڈیلی اردو) عراقی انٹیلی جنس ادارے نے دیالیٰ کے ضلع ہبہب میں ایک مسجد اور اس کے اطراف عمارتوں کی دیواروں پر داعش کے نعروں پر مبنی تحریریں لکھنے والے مبینہ شخص کو گرفتار کرلیا۔

عراقی انٹیلی جنس و وفاقی تحقیقات کے ادارے کے مطابق کارروائی خفیہ معلومات اور تکنیکی نگرانی کی بنیاد پر کی گئی، جس کے نتیجے میں ملزم کی شناخت کرکے اسے تحریریں لکھنے کے چند گھنٹوں بعد ہی حراست میں لے لیا گیا۔

ادارے کا کہنا ہے کہ مبینہ طور پر داعش سے منسوب تحریروں کا مقصد شہریوں میں خوف پھیلانا اور علاقے کی صورتحال کو متاثر کرنا تھا، تاہم ابتدائی تحقیقات میں واقعے کے پس پردہ ذاتی نوعیت کے تنازع کا بھی انکشاف ہوا ہے۔

عراقی حکام کے مطابق گرفتار شخص کے ایک قریبی رشتہ دار کو انسداد دہشتگردی قانون کی دفعہ 4 کے تحت مطلوب قرار دیا جاچکا ہے۔ واقعے کے مزید پہلوؤں کی تحقیقات جاری ہیں۔