عراق: لاکھوں پاکستانی زائرین حضرت امام حسینؑ کے چہلم میں شرکت نہیں کر سکیں گے

بغداد (ڈیلی اردو) عراقی حکومت کی طرف سے ویزا پالیسی میں تبدیلی کر دی گئی۔ عراقی سفارتخانے کا کہنا ہے ویزہ درخواستوں کی منظوری عراق سے دی جا رہی ہے۔

عراقی حکومت کی طرف سے ویزا پالیسی میں تبدیلی کے باعث اربعین کے موقع پر عراق جانے والے لاکھوں زائرین کو مشکلات درپیش ہونے کا خدشہ ہے۔

عراقی سفارتخانے کا کہنا ہے اسلام آباد سے ویزے جاری نہیں کیے جا رہے بلکہ ویزہ درخواستوں کی منظوری عراق سے دی جا رہی ہے۔

عراقی سفارتخانہ حکام کا کہنا ہے کہ اس بار ہمیں کہا گیا آپ منظوری کیلئے درخواستیں عراق بھیجی جائیں۔

درخواستیں عراق بھیجنے کے عمل سے اربعین پر پہنچنا ممکن نہیں رہے گا۔

ذرائع کا کہنا ہے کہ چہلم شہدائے کربلا پر پاکستان سے ہر سال کم از کم 30 سے 35 لاکھ زائرین عراق جاتے ہیں لیکن عراقی حکومت کی نئی ویزا پالیسی کے باعث زائرین کے لئے پریشان کن صورتحال پیدا ہو گئی ہے۔ کیونکہ نئی پالیسی کی وجہ سے ویزوں کے حصول میں 20 روز تک کی تاخیر ہو سکتی ہے جسے کسی بھی طرح زائرین کے لئے خوش کن قرار نہیں دیا جا سکتا۔ پیشگی اجازت کی شرط کی وجہ سے خصوصاً وہ زائرین زیادہ متاثر ہو رہے ہیں جنہوں نے ویزے کے حصول کیلئے 20 ستمبر سے اپنی سفری دستاویزات جمع کرا رکھی ہیں۔

پاکستان کے زائرین نے حکومت پاکستان سے عراقی حکومت سے رابطے کا مطالبہ کیا ہے کہ گزشتہ برسوں کی طرح سکیم بحال کی جائے۔