عمان کے ساحل کے قریب تیل بردار جہاز پر ڈرون حملہ، عملے کے انخلا اور نقصان کا جائزہ لینے کے لیے کارروائی شروع

مسقط(ڈیلی اردو) سلطنت عمان کے ساحل کے قریب ایک تیل بردار جہاز کو ڈرون حملے میں نشانہ بنایا گیا ہے۔ برطانوی میری ٹائم ٹریڈ آپریشنز ادارے (یو کے ایم ٹی او) کے مطابق جہاز کو صحار کی بندرگاہ کے قریب حملے میں نقصان پہنچا، جس کے بعد مقامی حکام نے عملے کے انخلا اور جہاز کو پہنچنے والے نقصان کا جائزہ لینے کے لیے کارروائی شروع کردی۔

ادارے کے مطابق واقعے کے بعد ماحولیاتی نقصان کی صورتِ حال تاحال واضح نہیں ہوسکی۔ حملے میں عملے کے افراد کے زخمی یا ہلاک ہونے سے متعلق بھی فراہم کردہ رپورٹ میں کوئی تفصیل نہیں دی گئی۔

یہ واقعہ آبنائے ہرمز اور اس کے آس پاس تجارتی جہازوں کو پیش آنے والے سکیورٹی واقعات کے دوران سامنے آیا ہے۔ آبنائے ہرمز عالمی توانائی کی ترسیل کے لیے انتہائی اہم گزرگاہ ہے، جہاں سے جنگ سے قبل دنیا کی تقریباً پانچویں حصے کی تیل اور مائع قدرتی گیس کی رسد گزرتی تھی۔

خطے میں ایران اور امریکہ کے درمیان جاری کشیدگی کے باعث اس اہم بحری راستے کی سلامتی پر تشویش بڑھ گئی ہے۔ تاہم تیل بردار جہاز پر حملے کے ذمہ داروں اور حملے کے محرکات کے بارے میں تاحال کوئی تصدیق شدہ معلومات سامنے نہیں آئی ہیں۔