غزہ پر اسرائیلی حملہ، حماس کے رہنما علی العمودی کو نشانہ بنانے کا دعویٰ

غزہ(ڈیلی اردو) غزہ شہر کے مغربی علاقے میں اسرائیلی فضائی حملے میں 5 فلسطینی ہلاک اور متعدد زخمی ہوگئے، جبکہ اسرائیلی فوج نے دعویٰ کیا ہے کہ حملے کا اصل ہدف حماس کے اہم رہنما علی العمودی تھے۔

اسرائیلی فوج کے مطابق حملہ اس وقت کیا گیا جب علی العمودی مبینہ طور پر حماس کی جانب سے سرگرمیوں کے لیے استعمال کیے جانے والے ایک اپارٹمنٹ میں موجود تھے۔ تاہم اسرائیلی حکام نے یہ واضح نہیں کیا کہ حملے میں علی العمودی ہلاک ہوئے یا نہیں۔

مقامی حکام کے مطابق حملہ جمعہ اور ہفتہ کی درمیانی شب غزہ شہر کے مغربی حصے میں واقع الرمال محلے کی الاصالہ عمارت کے ایک اپارٹمنٹ پر کیا گیا۔ حملے کے نتیجے میں عمارت کے مذکورہ فلیٹ کو شدید نقصان پہنچا اور وہاں آگ بھڑک اٹھی۔

الشفا میڈیکل کمپلیکس کے ایک عہدیدار نے بتایا کہ حملے کے بعد اسپتال میں 5 لاشیں اور متعدد زخمی لائے گئے۔ ہلاک ہونے والوں میں چار خواتین اور ایک نوجوان شامل ہیں، جبکہ خواتین میں دو بیٹیاں اور ان کی مائیں شامل تھیں۔

غزہ کی سول ڈیفنس کے ترجمان محمود بصل کے مطابق نشانہ بنائے گئے اپارٹمنٹ پر دو میزائل براہ راست لگے، جس سے بڑے پیمانے پر تباہی ہوئی اور عمارت میں آگ بھڑک اٹھی۔ حملے میں متعدد افراد کے زخمی ہونے کی بھی اطلاع ہے۔