غزہ پر مکمل قبضہ ہمارا ہدف ہے، اسرائیلی وزیر

یروشلم (ڈیلی اردو) اسرائیل کے وزیر برائے توانائی و انفراسٹرکچر ایلی کوہن نے کہا ہے کہ غزہ کی پٹی پر اسرائیل کا کنٹرول مسلسل بڑھایا جائے گا اور اس کا ہدف پورے علاقے پر مکمل کنٹرول حاصل کرنا ہے۔

اسرائیلی ریڈیو سے گفتگو کرتے ہوئے ایلی کوہن نے کہا کہ اسرائیل حماس کو "ایک ملی میٹر بھی سر اٹھانے کی اجازت نہیں دے سکتا" اور اسی مقصد کے تحت فوجی کارروائیاں اور زمینی کنٹرول کا دائرہ مسلسل وسیع کیا جا رہا ہے۔

انہوں نے دعویٰ کیا کہ تقریباً دو ماہ قبل غزہ کے 53 فیصد علاقے پر اسرائیلی کنٹرول تھا، جو ایک ماہ قبل بڑھ کر 60 فیصد ہو گیا، جبکہ اب یہ تقریباً 70 فیصد تک پہنچ چکا ہے۔

ایلی کوہن کے مطابق اسرائیلی حکومت کی پالیسی کے تحت اس کنٹرول میں مزید اضافہ کیا جائے گا، یہاں تک کہ غزہ کی پوری پٹی اسرائیلی کنٹرول میں آ جائے۔

غزہ میں اسرائیلی فوجی کارروائیاں بدستور جاری ہیں، جبکہ بین الاقوامی سطح پر جنگ، انسانی بحران اور شہری ہلاکتوں پر شدید تشویش کا اظہار کیا جا رہا ہے۔ 

دوسری جانب حماس اور دیگر فلسطینی مزاحمتی گروپ بھی مختلف علاقوں میں اسرائیلی افواج کے خلاف کارروائیاں جاری رکھنے کا اعلان کرتے رہے ہیں۔