فیلڈ مارشل عاصم منیر کی بلوچ سیاسی قیادت اور عمائدین سے ملاقات، امن و ترقی پر گفتگو

اسلام آباد(ڈیلی اردو) پاکستانی فوج کے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے بلوچ سیاسی قیادت اور اہم شخصیات سے ملاقات کی، جس میں بلوچستان میں امن و استحکام، ترقی، نوجوانوں کے کردار اور صوبے کو درپیش مختلف امور پر تبادلہ خیال کیا گیا۔

ملاقات کے دوران فیلڈ مارشل عاصم منیر نے کہا کہ بلوچستان اور پاکستان کا مستقبل ایک دوسرے سے جڑا ہوا ہے۔ انہوں نے بلوچستان کے عوام کو باصلاحیت، ثابت قدم، محب وطن اور باوقار قرار دیتے ہوئے ان کی صلاحیتوں کو سراہا۔

انہوں نے کہا کہ پائیدار امن، استحکام اور واضح قومی مؤقف بلوچستان کی معاشی صلاحیتوں سے بھرپور استفادہ کرنے کے لیے ضروری ہیں۔ امن و استحکام سے صوبے میں سرمایہ کاری کے مواقع بڑھانے اور انسانی و قدرتی وسائل کو عوام کی خوشحالی میں تبدیل کرنے میں مدد ملے گی۔

آرمی چیف نے بلوچستان کے نوجوانوں کو صوبے اور ملک کا اہم سرمایہ قرار دیتے ہوئے کہا کہ نوجوانوں کو بااختیار بنانا اور انہیں قومی ترقی میں مؤثر کردار ادا کرنے کے مواقع فراہم کرنا ضروری ہے۔

فیلڈ مارشل عاصم منیر نے کہا کہ دہشتگرد عناصر بلوچستان میں بدامنی پیدا کرنے، ترقی کی راہ میں رکاوٹ ڈالنے اور ریاست و عوام کے درمیان فاصلے پیدا کرنے کی کوششیں کر رہے ہیں، تاہم قوم کے اجتماعی عزم اور ریاست کے بھرپور ردعمل سے ان عزائم کو ناکام بنایا جائے گا۔

انہوں نے بلوچستان کے عمائدین اور سماجی رہنماؤں کے امن، سماجی ہم آہنگی اور مثبت قومی مکالمے کے فروغ میں کردار کو سراہتے ہوئے زور دیا کہ منفی پروپیگنڈے اور جھوٹے بیانیوں کا مؤثر انداز میں مقابلہ کیا جائے۔

فیلڈ مارشل عاصم منیر نے کہا کہ بلوچستان کی ترقی اور مستقبل کا فیصلہ صوبے کے عوام ہی کریں گے۔ ملاقات میں شریک سیاسی رہنماؤں اور عمائدین نے بلوچستان سمیت ملک میں امن، ترقی اور خوشحالی کے لیے اپنے عزم کا اعادہ کیا اور دہشتگردی کے خلاف ریاست اور سیکیورٹی فورسز کے ساتھ کھڑے رہنے کا اظہار کیا۔