لکی مروت : دوران نماز مسجد پر کواڈکاپٹر سے دھماکہ خیز مواد گرا دیاگیا

لکی مروت(ڈیلی اردو) خیبر پختونخوا کے شورش زدہ ضلع لکی مروت میں نامعلوم دہشتگردوں کی جانب سے مبینہ طور پر کواڈ کاپٹر کے ذریعے مسجد پر دھماکہ خیز مواد گرانے کا واقعہ پیش آیا ہے۔ واقعے کے وقت نمازی مسجد میں عبادت میں مصروف تھے۔

مقامی ذرائع کے مطابق یہ واقعہ تھانہ غزنی خیل کی حدود میں واقع گاؤں خیرو خیل پکہ کی مور مسجد میں پیش آیا، جہاں نماز کے دوران کواڈ کاپٹر کے ذریعے دھماکہ خیز مواد گرایا گیا۔ ابتدائی اطلاعات میں کسی جانی نقصان یا املاک کو پہنچنے والے نقصان کی تصدیق نہیں ہوسکی، جبکہ واقعے کی مزید تفصیلات سامنے آنا باقی ہیں۔

خیبر پختونخوا میں دہشتگردی کے واقعات میں بغیر پائلٹ طیاروں کے مبینہ استعمال پر سکیورٹی خدشات بڑھ رہے ہیں، کیونکہ ایسے آلات کے ذریعے دور سے دھماکہ خیز مواد گرانا شہری آبادی کے لیے خطرہ بن سکتا ہے۔

دوسری جانب باجوڑ سے سامنے آنے والی مبینہ ویڈیو کے حوالے سے بھی یہ الزامات زیرِ بحث ہیں کہ دہشتگرد عناصر خواتین اور بچوں کی موجودگی والے رہائشی مکانات کو اپنی سرگرمیوں کے لیے استعمال کرتے ہیں۔ تاہم ویڈیو میں موجود افراد کی شناخت اور واقعے کے حالات کی آزادانہ تصدیق ضروری ہے۔ شہری آبادی کو مسلح سرگرمیوں کے لیے ڈھال بنانا عام شہریوں کی زندگیوں کو خطرے میں ڈال سکتا ہے۔