لکی مروت میں خفیہ اطلاع پر پولیس کارروائی، 4 دہشتگرد ہلاک

لکی مروت(ڈیلی اردو) خیبرپختونخواہ کے شورش زدہ ضلع لکی مروت کے علاقے سگئی میں پولیس نے خفیہ اطلاع کی بنیاد پر کارروائی کرتے ہوئے مبینہ طور پر تحریک طالبان پاکستان (ٹی ٹی پی) سے وابستہ چار دہشتگردوں کو ہلاک کردیا۔

لکی پولیس امن کمیٹی کے مطابق کارروائی برگی پولیس اسٹیشن کی حدود میں واقع سگئی کے علاقے میں کی گئی۔ پولیس کو علاقے میں مسلح دہشتگرد عناصر کی موجودگی کی اطلاع موصول ہوئی تھی، جس پر پولیس نے مبینہ ٹھکانے کو نشانہ بنایا۔

ذرائع کے مطابق کارروائی کے دوران پولیس اور مسلح افراد کے درمیان فائرنگ کا تبادلہ ہوا، جس کے نتیجے میں چار دہشتگرد ہلاک ہونے کی اطلاع ہے۔

پولیس کے مطابق خفیہ اطلاعات کی بنیاد پر کی جانے والی کارروائیوں کا مقصد دہشتگرد عناصر کے ٹھکانوں اور نیٹ ورک کا سراغ لگا کر انہیں کارروائیوں سے قبل روکنا اور مقامی آبادی کے تحفظ کو یقینی بنانا ہے۔