لکی مروت میں سیکیورٹی فورسز کا ڈرون حملہ ، 2 دہشتگرد ہلاک

لکی مروت(ڈیلی اردو) خیبرپختونخواہ کے شورش زدہ ضلع لکی مروت میں سیکیورٹی فورسز نے خفیہ اطلاعات کی بنیاد پر لکی مروت کے علاقے کوٹکائی میں مبینہ دہشتگردوں کے ایک ٹھکانے کو ڈرون کے ذریعے نشانہ بنایا، جس کے نتیجے میں دو دہشتگرد ہلاک جبکہ چار دیگر زخمی ہونے کی اطلاعات ہیں۔

سیکیورٹی ذرائع کے مطابق کارروائی کے دوران کواڈ کاپٹر کے ذریعے ٹھکانے پر بارودی مواد گرایا گیا، جس سے وہاں موجود مسلح افراد کو نشانہ بنایا گیا۔ ذرائع کا کہنا ہے کہ ہلاک ہونے والوں میں رضوان عرف سید بھی شامل ہے، جسے مبینہ طور پر گروپ کا کمانڈر بتایا جاتا ہے، جبکہ دوسرا ہلاک شخص مصطفیٰ کے نام سے شناخت کیا گیا ہے۔

ذرائع کے مطابق حملے میں مزید چار دہشتگرد زخمی ہوئے۔ کارروائی مبینہ طور پر کالعدم تحریک طالبان پاکستان سے وابستہ ایک گروپ کی موجودگی کی اطلاعات ملنے کے بعد کی گئی، جسے عدنان گروپ سے منسلک بتایا جاتا ہے۔

کارروائی کے بعد سیکیورٹی فورسز نے علاقے میں نگرانی مزید بڑھا دی ہے اور مشتبہ عناصر کی نقل و حرکت پر نظر رکھنے کے ساتھ ممکنہ سہولت کاروں کی تلاش بھی جاری ہے۔