لکی مروت میں پولیس اور سی ٹی ڈی کا آپریشن، مطلوب دہشتگرد کمانڈر ہلاک

لکی مروت(ڈیلی اردو) خیبرپختونخواہ کے شورش زدہ ضلع لکی مروت میں پولیس اور کاؤنٹر ٹیررازم ڈیپارٹمنٹ (سی ٹی ڈی) کے مشترکہ آپریشن کے دوران شہریوں پر مبینہ حملوں اور سنگین دہشتگردی کے مقدمات میں مطلوب مقامی دہشتگرد کمانڈر منظور ولد عزت ہلاک ہوگیا۔

پولیس کے مطابق عبدالخیل کے علاقے میں گزشتہ روز میچ کھیل کر رکشے کے ذریعے واپس جانے والے کھلاڑیوں پر دہشتگردوں نے مبینہ حملہ کیا تھا، جس میں 3 افراد ہلاک اور 3 زخمی ہوئے۔ واقعے کی اطلاع ملنے کے بعد ڈی پی او لکی مروت سجاد احمد کی ہدایت پر پولیس اور سی ٹی ڈی کی بھاری نفری نے علاقے کو گھیرے میں لے کر سرچ آپریشن شروع کیا۔

پولیس کا کہنا ہے کہ ڈی پی او کی نگرانی میں مشترکہ کارروائی کئی گھنٹوں تک جاری رہی، اس دوران سکیورٹی اہلکاروں اور دہشتگردوں کے درمیان فائرنگ کا تبادلہ ہوا۔ جھڑپ کے دوران شہریوں پر مبینہ حملوں میں ملوث اور سی ٹی ڈی بنوں کو سنگین دہشتگردی کے مقدمات میں مطلوب کمانڈر منظور ہلاک ہوگیا۔

پولیس کے مطابق ہلاک شخص کے خلاف سی ٹی ڈی بنوں میں متعدد سنگین مقدمات درج تھے، جبکہ اس حوالے سے مزید تفصیلات پولیس ریکارڈ کی بنیاد پر سامنے لائی جا رہی ہیں۔ پولیس نے ہلاک کمانڈر کی لاش تحویل میں لے لی ہے۔

علاقے میں دیگر ممکنہ دہشتگردوں کی موجودگی کے خدشے کے پیش نظر سرچ اور کومبنگ آپریشن جاری ہے، جبکہ پولیس کا کہنا ہے کہ مشتبہ افراد کی گرفتاری اور علاقے کو مکمل طور پر محفوظ بنانے کے لیے کارروائیاں مزید آگے بڑھائی جا رہی ہیں۔