مالی میں کڈال شہر پر فوج کا دوبارہ کنٹرول، بغیر مزاحمت داخل ہونے کا دعویٰ

کڈال(ڈیلی اردو) مالی کی فوج نے شمالی علاقے کے اہم شہر کڈال میں بغیر کسی مزاحمت کے داخل ہونے کا اعلان کیا ہے، جہاں اپریل میں وسیع پیمانے پر ہونے والی کارروائی کے بعد آزادی پسند گروہ ’’ازواد لبریشن فرنٹ‘‘ کا کنٹرول قائم ہوگیا تھا۔

فرانسیسی خبر رساں ادارے کے مطابق مالی فوج کے دو افسران نے تصدیق کی کہ فوجی قافلہ منگل کی صبح انیفیس سے روانہ ہوا اور مقامی وقت کے مطابق دوپہر ایک بجے سے قبل کڈال پہنچ گیا۔ ایک فوجی افسر کے مطابق شہر میں داخلے کے دوران کسی قسم کی مزاحمت کا سامنا نہیں کرنا پڑا اور فوج نے مختلف مقامات پر اپنی پوزیشنیں سنبھال لی ہیں۔

دوسری جانب ازواد لبریشن فرنٹ نے اپنے جنگجوؤں کے انخلا کو ’’حکمت عملی کے تحت منظم واپسی‘‘ قرار دیتے ہوئے کہا ہے کہ یہ فیصلہ عارضی طور پر انسانی اور لاجسٹک صلاحیتوں کو محفوظ رکھنے کے لیے کیا گیا۔ گروہ کے مطابق انخلا کے دوران براہ راست لڑائی نہیں ہوئی۔

گروہ نے اپنے فیصلے کی وجہ شہر میں موجود شہریوں کو لاحق بڑھتے ہوئے خطرات کو قرار دیا اور مالی فوج کے ساتھ روسی ’’افریقہ کور‘‘ پر شہری علاقوں اور بنیادی ڈھانچے کے خلاف غیر متناسب فضائی حملوں کے الزامات عائد کیے ہیں۔

مالی فوج کے ایک افسر نے بتایا کہ کڈال کے اطراف گزشتہ کئی روز سے کارروائیاں جاری تھیں، جن کا مقصد شہریوں کا تحفظ اور مسلح گروہوں کے خلاف کارروائی کرنا تھا۔ مالی فوج اور روسی افریقہ کور نے بھی منگل کی صبح علاقے میں بڑے پیمانے پر زمینی اور فضائی کارروائی شروع کرنے کا اعلان کیا تھا۔

کڈال پر ازواد لبریشن فرنٹ کا قبضہ اپریل میں ہونے والی ایک بڑی کارروائی کے بعد ہوا تھا، جس میں طوارق علیحدگی پسندوں کے ساتھ القاعدہ سے منسلک ’’جماعت نصرت الاسلام والمسلمین‘‘ کے مسلح عناصر بھی شامل تھے۔ اس حملے میں مالی کے وزیر دفاع سادیو کامارا بھی ہلاک ہوئے تھے۔

مالی میں 2012 سے جاری بدامنی میں القاعدہ اور داعش سے وابستہ گروہوں کی کارروائیوں کے ساتھ طوارق مسلح گروہوں کی بغاوت اور مقامی جرائم پیشہ عناصر کی سرگرمیاں بھی شامل ہیں، جس کے باعث ملک کا شمالی علاقہ مسلسل سکیورٹی بحران کا شکار ہے۔