متنازعہ ٹوئیٹس: ایمان مزاری اور اور ہادی علی کو 17، 17 سال قید کی سزا

اسلام آباد (ڈیلی اردو ) پاکستانی دارالحکومت اسلام آباد کی ایک عدالت نے پاکستانی فوج کی ناقد وکیل ایمان زینب مزاری اور ان کے شوہر ہادی علی چٹھہ کو سوشل میڈیا پوسٹس سے متعلق ایک کیس میں متعدد الزامات کے تحت مجموعی طور پر 17، 17 سال قید کی سزا سنائی ہے۔

اس وکیل جوڑے کو گزشتہ روز گرفتاری کے بعد جوڈیشل ریمانڈ پر راولپنڈی کی اڈیالہ جیل بھیج دیا گیا تھا۔

ایڈیشنل ڈسٹرکٹ اینڈ سیشن جج محمد افضل مجوکا کے تحریری حکم نامے کہا گیا ہے کہ ’’استغاثہ دونوں ملزمان کے خلاف ’پروینشن آف الیکٹرانک کرائمز ایکٹ‘ (پیکا) کی دفعات نو (جرم کی تشہیر)، 10 (سائبر دہشت گردی)، اور 26-اے (جھوٹی اور جعلی معلومات) کے تحت اپنا کیس ثابت کرنے میں کامیاب رہا ہے۔‘‘

فیصلے میں کہا گیا ہے کہ ’’انہوں نے ایک ایسا بیانیہ پروان چڑھایا جو معاندانہ دہشت گرد گروہوں اور ممنوعہ تنظیموں اور افراد کے ساتھ مطابقت رکھتا تھا۔ ان کا مواد نسلی منافرت پھیلاتا تھا، ریاستی اداروں پر عوامی اعتماد کو ٹھیس پہنچاتا تھا اور مسلح افواج کو دہشت گردی اور جبری گمشدگیوں کے پیچھے دکھاتا تھا۔‘‘

حکم نامے میں کہا گیا ہے کہ ایمان کی 2021 سے 2025 کے درمیان کی گئی ٹویٹس میں کالعدم بلوچستان لبریشن آرمی (BLA) اور تحریک طالبان پاکستان (TTP) کے ’’ایجنڈے کی عکاسی‘‘ کی گئی۔

جمعہ کے روز ایمان اور ہادی کی گرفتاری پر انسانی حقوق کی تنظیموں، سیاست دانوں اور صحافیوں نے تنقید کی تھی، جنہوں نے جوڑے کے منصفانہ ٹرائل کے حق پر زور دیا تھا۔

انسانی حقوق کی بین الاقوامی تنظیم ایمنسٹی انٹرنیشنل نے ’’قانونی تقاضوں کی عدم پابندی‘‘ کا ذکر کرتے ہوئے کہا کہ یہ ’’انتقامی مقدمات ہیں جن کا مقصد صرف ایمان اور ہادی کو ان کے انسانی حقوق کے کام اور اختلافِ رائے پر خاموش کرنا ہے۔‘‘

ہیومن رائٹس کمیشن آف پاکستان (HRCP) نے بھی ان گرفتاریوں کی مذمت کرتے ہوئے اس کیس کو ’’ہراساں کرنے، ڈرانے دھمکانے اور بالآخر اختلافِ رائے کو کچلنے کا ہتھیار‘‘ قرار دیا۔۔