مستونگ کے کھڈکوچہ میں مدینہ ہوٹل دھماکے سے تباہ، قریبی املاک کو بھی نقصان

مستونگ (ڈیلی اردو) بلوچستان کے شورش زدہ ضلع مستونگ کی تحصیل کھڈکوچہ کے علاقے ریکی بوز میں نامعلوم مسلح افراد نے مبینہ طور پر دھماکا خیز مواد کے ذریعے مدینہ ہوٹل کو نشانہ بنایا، جس کے نتیجے میں عمارت مکمل طور پر منہدم ہوگئی۔

مقامی ذرائع کے مطابق دھماکا گزشتہ شام ہوا اور اس کی شدت سے ہوٹل سے متصل ایک پرچون کی دکان بھی تباہ ہوگئی، جبکہ قریبی ٹیوب ویلوں پر نصب سولر پلیٹس کو بھی نقصان پہنچا۔ دھماکے کے اثرات سے آس پاس کے گھروں کی کھڑکیوں کے شیشے بھی ٹوٹ گئے۔

واقعے کے بعد علاقے میں خوف و ہراس پھیل گیا۔ اطلاع ملنے پر متعلقہ حکام اور سکیورٹی اہلکار موقع پر پہنچ گئے اور جائے وقوعہ کا معائنہ کرنے کے ساتھ شواہد اکٹھے کرنا شروع کردیے۔

حکام کے مطابق دھماکے کی اصل نوعیت، اس کے محرکات اور واقعے میں ملوث افراد کا تعین تحقیقات مکمل ہونے کے بعد کیا جائے گا۔ ابتدائی اطلاعات میں کسی جانی نقصان کی تصدیق نہیں کی گئی۔