معروف بھارتی اداکارہ نے محبت میں ناکامی پر خودکشی کرلی

حیدرآباد (ویب ڈیسک) بھارتی میڈیا کے مطابق بھارتی تیلگو ٹی وی کی معروف اداکارہ ناگا جھانسی کی پنکھے سے لٹکی لاش بھارتی شہر حیدر آباد میں واقع ان کے اپارٹمنٹ سے برآمد ہوئی ۔

پولیس کے مطابق 21 سالہ ناگا جھانسی واقعے کے وقت اپنے گھر میں اکیلی تھی۔ اس کے بھائی درگا پرساد نے کئی بار کوشش کے باوجود گھر کا دروازہ نہ کھلنے پر پڑوسیوں کے ساتھ مل کر دروازہ توڑ دیا جہاں ناگا جھانسی کی لاش پنکھے سے لٹکی ہوئی تھی۔ پولیس نے واقعے کا مقدمہ درج کرلیا ہے۔

میڈیا رپورٹس کے مطابق جھانسی کے رشتے دار کا کہنا ہے کہ جھانسی اپنے رشتے دار سوریا کی محبت میں گرفتار تھی تاہم دونوں کے رشتے کو سوریا کے گھر والوں کی طرف سے منظوری نہیں مل رہی تھی جب کہ لڑکے نے بھی جھانسی کو رشتے سے انکار کر دیا تھا۔ سوریا کے انکار پر جھانسی نے دلبرداشتہ ہو کر اپنی زندگی کا خاتمہ کرلیا۔

پولیس نے اداکارہ جھانسی کا موبائل فون اور لاش کے پاس سے برآمد ہونے والا سوسائیڈ نوٹ قبضے میں لے لیا ہے جب کہ کیس کی تفتیش جاری ہے۔ دوسری جانب جھانسی کی خودکشی کی خبرسن کر سوریا روپوش ہوگیا ہے۔

واضح رہے کہ اداکارہ ناگا جھانسی کا شمارتیلگو ٹی وی کی معروف اداکاراؤں میں ہوتاتھا انہوں نے مقبول تیلگو شو ’’پوتر بندھن‘‘سے بہت کم عرصے میں شہرت حاصل کرلی تھی۔