مکہ کی فضائی حدود کی جانب آنے والا حوثی ڈرون سعودی دفاعی نظام نے مار گرایا

مکہ (ڈیلی اردو) سعودی عرب نے دعویٰ کیا ہے کہ فضائی دفاعی نظام نے حوثی باغیوں کی جانب سے بھیجے گئے ایک ڈرون کو مکہ مکرمہ کی ممنوعہ فضائی حدود میں داخل ہونے سے قبل روک کر تباہ کردیا۔

سعودی وزارت دفاع کے ترجمان میجر جنرل ترکی المالکی کے مطابق ڈرون کو منگل کی شام تقریباً 6 بج کر 50 منٹ پر جنوبی مکہ مکرمہ کے قریب روکا گیا۔ ان کے بقول بغیر پائلٹ طیارہ حوثی باغیوں کی جانب سے لانچ کیا گیا تھا اور سعودی دفاعی فورسز نے اسے ہدف تک پہنچنے سے پہلے ہی ناکارہ بنا دیا۔

ترجمان نے بتایا کہ یہ مکہ مکرمہ کو نشانہ بنانے کی مبینہ دوسری کوشش ہے۔ سعودی حکام کے مطابق اس سے قبل جولائی 2017 میں بھی مکہ مکرمہ کی سمت بیلسٹک میزائل داغے جانے کا واقعہ پیش آیا تھا۔

ترکی المالکی نے واقعے کو مکہ مکرمہ اور حرمین شریفین کی سلامتی کے لیے سنگین خطرہ قرار دیتے ہوئے کہا کہ سعودی عرب حرمین شریفین اور زائرین کے تحفظ پر کوئی سمجھوتہ نہیں کرے گا۔

سعودی وزارت دفاع کے ترجمان کے مطابق مکہ مکرمہ کے خلاف کسی بھی ممکنہ خطرے سے نمٹنے کے لیے ضروری دفاعی اقدامات کیے جائیں گے۔ انہوں نے کہا کہ شہریوں، مقیم افراد اور حرمین شریفین کے زائرین کی حفاظت سعودی حکام کی اولین ترجیحات میں شامل ہے۔