نوشکی :پولیو ٹیم کی سکیورٹی پر مامور 2 پولیس اہلکار حملے میں ہلاک

نوشکی(ڈیلی اردو) بلوچستان کے شورش زدہ ضلع نوشکی میں انسدادِ پولیو مہم کے دوران سکیورٹی پر تعینات پولیس اہلکاروں کو مسلح افراد نے فائرنگ کا نشانہ بنا دیا، جس کے نتیجے میں 2 پولیس اہلکار ہلاک ہوگئے۔

پولیس کے مطابق واقعہ نوشکی شہر کے مضافاتی علاقے ظہر آباد میں پیش آیا، جہاں نامعلوم مسلح افراد نے پولیو ٹیم کے ہمراہ موجود پولیس اہلکاروں پر حملہ کیا۔ فائرنگ کے وقت خواتین پر مشتمل پولیو ٹیم محفوظ رہی، تاہم حملہ آور ہلاک ہونے والے اہلکاروں کا سرکاری اسلحہ بھی ساتھ لے گئے۔

حکام کے مطابق ہلاک ہونے والے پولیس اہلکاروں کی شناخت محمد یاسر اور عبدالروف کے نام سے ہوئی ہے۔ واقعے کے بعد پولیس نے علاقے میں ملزمان کی تلاش شروع کر دی ہے جبکہ حملے کے محرکات اور ذمہ داروں کا تعین کرنے کے لیے تحقیقات جاری ہیں۔

نوشکی پولیس کے ایس پی سلیم شاہوانی نے واقعے کی تصدیق کرتے ہوئے بتایا کہ ملزمان کی گرفتاری کے لیے کوششیں کی جا رہی ہیں۔ دوسری جانب وفاقی وزیر داخلہ محسن نقوی اور بلوچستان کے وزیر داخلہ میر ضیا اللہ لانگو نے حملے کی مذمت کرتے ہوئے واقعے کی رپورٹ طلب کرلی ہے۔

وزیر داخلہ میر ضیا اللہ لانگو نے آئی جی پولیس اور ایڈیشنل سیکریٹری داخلہ سے واقعے کی تفصیلی رپورٹ بھی طلب کی ہے۔ حکام کا کہنا ہے کہ انسدادِ پولیو مہم کے دوران سکیورٹی انتظامات کو مزید مؤثر بنانے کے لیے ضروری اقدامات کیے جا رہے ہیں۔