ٹانک : بی ایچ یو شیخ سلطان پر دوبارہ دھماکا، عمارت کو 80 فیصد نقصان

ٹانک(ڈیلی اردو) خیبرپختونخواہ کے شورش زدہ ضلع ٹانک  کے علاقے شیخ سلطان میں بنیادی مرکزِ صحت (بی ایچ یو) کو ایک بار پھر رات کے وقت بارودی مواد سے نشانہ بنایا گیا، جس کے نتیجے میں عمارت کا بڑا حصہ شدید متاثر ہوگیا۔ واقعے میں کسی جانی نقصان کی اطلاع نہیں ملی۔

مقامی ذرائع کے مطابق نامعلوم افراد نے رات کے وقت بی ایچ یو شیخ سلطان کی عمارت میں دھماکا کیا، جس سے مرکزِ صحت کے مختلف حصوں کو شدید نقصان پہنچا اور عمارت کا بڑا حصہ منہدم ہوگیا۔

ذرائع کا کہنا ہے کہ چند روز قبل بھی مذکورہ بنیادی مرکزِ صحت کو دھماکے کا نشانہ بنایا گیا تھا۔ حالیہ واقعے کے بعد بی ایچ یو شیخ سلطان کی عمارت تقریباً 80 فیصد تک متاثر ہونے کی اطلاعات ہیں۔

مسلسل حملوں کے باعث علاقے کے مکینوں کے لیے بنیادی طبی سہولیات کی فراہمی متاثر ہونے کا خدشہ ہے، جبکہ مرکزِ صحت کی بحالی اور طبی خدمات کی بحالی کے حوالے سے صورتحال واضح نہیں ہوسکی۔

پولیس اور سیکیورٹی حکام نے واقعے کی تحقیقات شروع کردی ہیں، جبکہ دھماکے میں ملوث افراد کا سراغ لگانے کے لیے کارروائی جاری ہے۔