ٹانک میں زیر تعمیر گرلز سکول دھماکے سے تباہ

ٹانک (ڈیلی اردو) پاکستان کے شورش زدہ صوبے خیبر پختونخوا کے ضلع ٹانک میں زیر تعمیر گرلز پرائمری سکول کو نامعلوم دہشت گردوں نے دھماکے سے تباہ کر دیا۔ 

پولیس کے مطابق یہ واقعہ گاؤں گرہ بڈھا میں پیش آیا، جہاں اسکول کی عمارت ابھی تعمیر کے مراحل میں تھی۔

واقعے کے بعد مقامی پولیس فورسز نے جائے وقوعہ کا معائنہ کیا اور دھماکے میں ہونے والے نقصان کی تصدیق کی۔ 

پولیس کے مطابق اسکول کو بارودی مواد لگا کر دھماکا کیا گیا، تاہم خوش قسمتی سے واقعے میں انسانی جانی نقصان کی اطلاع موصول نہیں ہوئی۔

پولیس نے کہا ہے کہ واقعے کی وجوہات معلوم کرنے کے لیے تحقیقات کا آغاز کر دیا گیا ہے۔

مقامی افراد نے واقعے پر شدید تشویش کا اظہار کیا اور کہا کہ ایسے حملے نہ صرف تعلیم کے شعبے کو نقصان پہنچاتے ہیں بلکہ معاشرتی ترقی میں رکاوٹ بھی بنتے ہیں۔