ٹانک میں ٹریفک پولیس وین پر فائرنگ، 3 اہلکار ہلاک، 2 افراد زخمی

ٹانک  (ڈیلی اردو) خیبرپختونخواہ کے شورش زدہ ضلع ٹانک کے علاقے وزیرآباد میں نامعلوم موٹرسائیکل سواروں نے ٹریفک پولیس کی وین پر فائرنگ کردی، جس کے نتیجے میں 3 پولیس اہلکار اہلکار کانسٹیبل گل امین خان، ڈرائیور فیاض الدین، اور سلیم شاہ (عرف قریشی) ہلاک جبکہ 2 افراد قیصر محمد اور ظفر حسین زخمی ہوگئے 

مقامی ذرائع کے مطابق فائرنگ کا واقعہ اس وقت پیش آیا جب ٹریفک پولیس اہلکار سرکاری فرائض انجام دے رہے تھے۔ حملہ آور فائرنگ کے بعد موقع سے فرار ہوگئے، جبکہ زخمی ہونے والوں میں ایک مجذوب شخص بھی شامل بتایا گیا ہے۔

واقعے کے بعد ہلاک ہونے والے اہلکاروں اور زخمیوں کو فوری طور پر ڈسٹرکٹ ہیڈکوارٹر اسپتال ٹانک منتقل کیا گیا، جہاں زخمیوں کو طبی امداد فراہم کی جارہی ہے۔

فائرنگ کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے لیا۔ پولیس نے حملہ آوروں کی گرفتاری اور ان کے فرار کے ممکنہ راستوں کا سراغ لگانے کے لیے سرچ آپریشن شروع کردیا ہے۔

پولیس حکام کے مطابق واقعے کی مختلف پہلوؤں سے تحقیقات جاری ہیں جبکہ حملہ آوروں کی شناخت اور حملے کے محرکات کا تعین کیا جارہا ہے۔ واقعے کے بعد علاقے میں خوف و ہراس پھیل گیا۔