ٹرمپ کا روس یوکرین جنگ میں توانائی تنصیبات پر حملے روکنے کا اعلان، زیلنسکی کا مشروط خیرمقدم، ماسکو کی تصدیق نہ ہوسکی

واشگنٹن(ڈیلی اردو) امریکی صدر ڈونلڈ ٹرمپ نے دعویٰ کیا ہے کہ روس اور یوکرین ایک دوسرے کی توانائی تنصیبات کو نشانہ نہ بنانے کے لیے ’’توانائی جنگ بندی‘‘ پر متفق ہوگئے ہیں۔ ٹرمپ کے مطابق یہ معاہدہ فوری طور پر نافذ العمل ہے، تاہم یوکرین نے اس کی تفصیلات طلب کرلی ہیں جبکہ روس کی جانب سے تاحال اس معاہدے کی باضابطہ تصدیق سامنے نہیں آئی۔

خبر رساں ادارے رائٹرز اور امریکی ویب سائٹ ایگزیوس کے مطابق ٹرمپ نے سوشل میڈیا پر اعلان کیا کہ دونوں ممالک توانائی کے بنیادی ڈھانچے پر حملے روکنے پر رضامند ہوگئے ہیں، لیکن انہوں نے معاہدے کی شرائط، مدت اور نگرانی کے طریقہ کار کی وضاحت نہیں کی۔

یوکرین کے صدر ولادیمیر زیلنسکی نے ابتدا میں اس اعلان پر حیرت کا اظہار کرتے ہوئے کہا کہ انہیں اس بارے میں پہلے سے آگاہ نہیں کیا گیا تھا۔ بعد ازاں انہوں نے واضح کیا کہ اگر روس واقعی توانائی تنصیبات پر حملے روکنے کے لیے تیار ہے تو یوکرین بھی اس اقدام کی حمایت کرے گا۔ زیلنسکی کے مطابق کیف امریکی حکام سے مذاکرات کی تفصیلات اور جنگ بندی کے آغاز سے متعلق وضاحت کا منتظر ہے۔

عالمی میڈیا کی تازہ اطلاعات کے مطابق اس اعلان کے بعد بھی جنگ بندی کی صورتِ حال غیر یقینی رہی۔ خبر رساں ادارے رائٹرز نے رپورٹ کیا کہ زیلنسکی نے روسی حملوں کے جاری رہنے کی نشاندہی کی، جبکہ امریکی نشریاتی و تحقیقی ویب سائٹ ایگزیوس کے مطابق یوکرین میں بجلی گھروں پر حملوں کی اطلاعات بھی سامنے آئیں۔ اس سے ظاہر ہوتا ہے کہ ٹرمپ کے اعلان کو تاحال کسی واضح اور باہمی طور پر تصدیق شدہ معاہدے کی شکل نہیں مل سکی۔

یہ پیش رفت ایسے وقت میں ہوئی ہے جب واشنگٹن کی جانب سے دونوں ممالک کے درمیان جنگ روکنے کے لیے سفارتی کوششیں جاری ہیں۔ توانائی تنصیبات پر حملوں میں کمی سے شہریوں کو بجلی اور ایندھن کی فراہمی میں بہتری آسکتی ہے، تاہم اس کے عملی نتائج کا انحصار روس اور یوکرین کی جانب سے معاہدے کی باضابطہ تصدیق اور اس پر عمل درآمد پر ہوگا۔