پاکستان بھر میں عاشورہ محرم کے موقع پر سخت سکیورٹی، ہزاروں اہلکار تعینات

اسلام آباد (ڈیلی اردو/اے پی) پاکستان بھر میں عاشورہ محرم کے موقع پر ممکنہ سکیورٹی خدشات کے پیش نظر غیر معمولی حفاظتی انتظامات کیے گئے ہیں، جبکہ جلوسوں اور مجالس کی سکیورٹی کے لیے ہزاروں پولیس، رینجرز، فرنٹیئر کور اور دیگر قانون نافذ کرنے والے اداروں کے اہلکار تعینات کر دیے گئے ہیں۔

امریکی  خبر رساں ادارے ایسوسی ایٹڈ پریس کے مطابق انٹیلیجنس اطلاعات میں خدشہ ظاہر کیا گیا ہے کہ بعض شدت پسند عناصر محرم کے جلوسوں اور مذہبی اجتماعات کو نشانہ بنانے کی کوشش کر سکتے ہیں، جس کے باعث ملک بھر میں سکیورٹی ہائی الرٹ کر دی گئی ہے۔

حکام کے مطابق حساس شہروں اور اضلاع میں جلوسوں کے راستوں پر اضافی نفری تعینات کی گئی ہے، جبکہ سی سی ٹی وی کیمروں، واک تھرو گیٹس، میٹل ڈیٹیکٹرز اور نگرانی کے جدید نظام سے بھی مدد لی جا رہی ہے۔ بعض حساس علاقوں میں جلوسوں اور مجالس کے دوران موبائل فون سروس عارضی طور پر معطل کیے جانے کا بھی امکان ہے تاکہ کسی بھی ممکنہ خطرے سے بروقت نمٹا جا سکے۔

اگرچہ پاکستان میں سنی اور شیعہ برادریاں عمومی طور پر پرامن انداز میں مذہبی رسومات ادا کرتی ہیں، تاہم ماضی میں فرقہ وارانہ دہشت گردی کے متعدد واقعات میں شیعہ مساجد، امام بارگاہوں، جلوسوں اور مذہبی اجتماعات کو نشانہ بنایا گیا، جن میں سینکڑوں افراد ہلاک اور زخمی ہوئے تھے۔

سرکاری نشریاتی ادارے پی ٹی وی کے مطابق وزیر مملکت برائے داخلہ امور طلال چوہدری نے محرم الحرام کے سکیورٹی انتظامات کا جائزہ لینے کے لیے ایک اعلیٰ سطحی اجلاس کی صدارت کی، جس میں تمام صوبوں، گلگت بلتستان اور آزاد جموں و کشمیر کے محکمہ داخلہ کے سیکرٹریز اور اعلیٰ پولیس حکام نے شرکت کی۔

اجلاس میں محرم کے جلوسوں، مجالس اور دیگر مذہبی اجتماعات کے لیے کیے گئے سکیورٹی انتظامات پر تفصیلی بریفنگ دی گئی۔

طلال چوہدری نے اجلاس سے خطاب کرتے ہوئے کہا کہ شہریوں کے جان و مال کا تحفظ حکومت کی اولین ترجیح ہے اور تمام قانون نافذ کرنے والے اداروں کو ہدایت کی گئی ہے کہ عاشورہ محرم کے دوران سکیورٹی اقدامات کو مزید مؤثر اور مربوط بنایا جائے تاکہ کسی بھی ناخوشگوار واقعے سے بچا جا سکے۔