پاکستان: سینیٹ سے انسدادِ اسمگلنگِ تارکینِ وطن ترمیمی بل منظور، عمرقید اور 50 لاکھ روپے جرمانہ

اسلام آباد (ڈیلی اردو) پاکستان کی سینیٹ نے انسدادِ اسمگلنگِ تارکینِ وطن کے حوالے سے ایک اہم ترمیمی بل متفقہ طور پر منظور کر لیا ہے۔ یہ بل چیئرمین سینیٹ یوسف رضا گیلانی کی زیرِ صدارت ہونے والے اجلاس میں سینیٹر ثمینہ ممتاز زہری نے پیش کیا۔

بل کے مطابق اب تارکینِ وطن کی اسمگلنگ میں ملوث ہر فرد کو عمر قید کی سزا دی جائے گی، جو 15 سال سے کم نہیں ہوگی، اور ساتھ ایک کروڑ روپے تک جرمانہ بھی عائد کیا جا سکے گا۔

جعلی یا غیر قانونی دستاویزات بنانے والے افراد کو بھی 15 سال تک قید کی سزا ہوگی، جس کی کم از کم حد سات سال مقرر کی گئی ہے، اور 50 لاکھ روپے تک جرمانہ عائد ہوگا۔

بل میں یہ بھی کہا گیا ہے کہ غیر قانونی رہائشی کو پناہ دینے والے کو 15 سال تک قید کی سزا دی جائے گی، جبکہ سزا کی کم از کم مدت سات سال اور جرمانہ 50 لاکھ روپے ہوگا۔

اسمگلنگ میں سہولت فراہم کرنے، مثلاً کمرا یا جگہ فراہم کرنا، 10 سال تک قید اور جرمانے کے قابل جرم ہوگا۔

اسی طرح مالی خدمات فراہم کرنے والے افراد کو بھی 10 سال تک قید اور جرمانہ ہوگا، جس میں اکاؤنٹنٹ یا وکیل کی جانب سے فراہم کی جانے والی خدمات بھی شامل ہیں۔

ترمیمی بل کے مطابق اسمگلروں کو پناہ دینے پر بھی 10 سال تک قید اور جرمانہ ہوگا، جبکہ اسمگلنگ کے لیے گاڑی یا سفری سہولت فراہم کرنے پر سات سال تک قید اور 50 لاکھ روپے تک جرمانہ ہوگا۔