پاکستان نے فتح-4 کروز میزائل کا کامیاب تجربہ کرلیا

راولپنڈی (ڈیلی اردو) پاکستان آرمی راکٹ فورس کمانڈ کے زیر اہتمام مقامی طور پر تیار کردہ فتح-4 گراؤنڈ لانچڈ کروز میزائل کا ’کامیاب تربیتی تجربہ‘ کیا گیا۔

فوج کے شعبہ تعلقات عامہ یعنی آئی ایس پی آر کے مطابق جدید ایویونکس اور جدید ترین نیویگیشنل نظام سے لیس یہ ہتھیار طویل فاصلے کے اہداف کو انتہائی درستگی کے ساتھ نشانہ بنانے کی صلاحیت رکھتا ہے۔

اس تربیتی تجربے کا مقصد دستوں کی عملی کارکردگی کو بہتر بنانا اور بہتر درستگی اور بڑھتی ہوئی بقا کے لیے شامل مختلف ذیلی نظاموں کے تکنیکی پہلوؤں کی تصدیق کرنا تھا۔

اس تربیتی فائر کا مشاہدہ پاکستان آرمی راکٹ فورس کمانڈ کے سینیئر افسران کے علاوہ ترقیاتی ادارے کے سائنسدانوں اور انجینئرز نے بھی کیا۔

آئی ایس پی آر کے مطابق صدر مملکت آصف زرداری، وزیرِ اعظم شہباز شریف اور فیلڈ مارشل سید عاصم منیر، نیول سٹاف کے سربراہ اور ایئر سٹاف کے سربراہ نے فتح-4 کے کامیاب تربیتی تجربے کو سراہا اور فتح سیریز کے میزائل پروگرام کی کامیابی میں حصہ لینے والے تمام افراد کی تکنیکی مہارت، لگن اور عزم کی تعریف کی۔