پاکستان چینی شہریوں کی حفاظت کیلئے خصوصی پروٹیکشن یونٹ قائم کریگا، محسن نقوی

بیجنگ (ڈیلی اردو) وفاقی وزیر داخلہ محسن نقوی نے چینی وزیر داخلہ وانگ ژاو ہونگ کے ساتھ بیجنگ میں ملاقات میں چینی شہریوں اور منصوبوں کی حفاظت کو اولین ترجیح قرار دیا اور انسداد دہشت گردی، پولیس ٹریننگ ایکسچینج پروگرام اور دوطرفہ تعاون کے شعبوں میں تعلقات کو مزید مضبوط بنانے پر تبادلہ خیال کیا۔

پاکستانی وزیر داخلہ نے چین کی وزارت پبلک سکیورٹی کے ہیڈ کوارٹر کا دورہ کیا، جہاں پاک چین وزرائے داخلہ کے درمیان تقریباً ساڑھے تین گھنٹے طویل ملاقات ہوئی۔ ملاقات میں دونوں فریقین نے ہر تین ماہ بعد مشترکہ ورکنگ گروپ کی میٹنگ اور انسداد دہشت گردی کے لیے دوطرفہ اقدامات پر بات چیت کرنے پر اتفاق کیا۔

وزارت داخلہ کے اعلامیے کے مطابق، ملاقات کے دوران دوطرفہ تعاون اور کوآرڈینیشن بہتر بنانے کی ضرورت پر زور دیا گیا۔ چینی وزیر داخلہ نے پاکستان کی انسداد دہشت گردی اور داخلی سکیورٹی کی کوششوں کو سراہا اور دہشت گردی کے خلاف پاکستان کی قربانیوں کو قدر کی نگاہ سے دیکھا۔

اس موقع پر وزیر داخلہ محسن نقوی نے کہا کہ:
"چینی شہریوں اور مشترکہ منصوبوں کا تحفظ ہماری اولین ترجیح ہے۔ پاکستان میں چینی شہریوں کی سکیورٹی کے لیے ہر سطح پر مضبوط اقدامات کیے گئے ہیں۔ اسلام آباد میں چینی شہریوں کی حفاظت کے لیے خصوصی پروٹیکشن یونٹ بنایا جا رہا ہے۔ سائبر کرائمز کی روک تھام میں چینی تعاون کا بھی خیرمقدم کریں گے۔"

دونوں رہنماؤں نے دہشت گردی اور جرائم کے خلاف مشترکہ اور فوری ردعمل کے نظام کو مزید مؤثر بنانے اور پولیس کی استعداد بڑھانے کے لیے ٹریننگ ایکسچینج پروگرام کے دائرہ کار کو وسعت دینے پر اتفاق کیا۔

چینی وزیر داخلہ نے اپنے پاکستانی ہم منصب کو ستمبر میں چین میں ہونے والے گلوبل سکیورٹی تعاون فورم میں شرکت کی دعوت بھی دی۔