پشاور: حسن خیل میں پولیس پوسٹ پر دہشتگردوں کا حملہ، ایک اہلکار ہلاک، 3 زخمی

پشاور(ڈیلی اردو) خیبرپختونخواہ کے شورش زدہ دارلحکومت پشاور کے علاقے حسن خیل میں پولیس پوسٹ سپین میلہ پر دہشتگردوں کے حملے میں ایک پولیس اہلکار ہلاک جبکہ تین زخمی ہوگئے۔ پولیس کی جوابی کارروائی کے دوران حملہ آور فرار ہوگئے۔

پولیس حکام کے مطابق گزشتہ شب 30 سے زائد دہشتگردوں نے دو اطراف سے پولیس پوسٹ کو نشانہ بنایا اور بھاری ہتھیاروں سے فائرنگ کی۔ پولیس اہلکاروں نے بھرپور جوابی کارروائی کرتے ہوئے حملہ آوروں کو پسپا ہونے پر مجبور کردیا۔

حکام کے مطابق فائرنگ کے تبادلے میں ایک پولیس اہلکار ہلاک اور تین زخمی ہوئے۔ حملے میں متعدد دہشتگردوں کے زخمی ہونے کی اطلاعات بھی ہیں، تاہم ان کی تاحال تصدیق نہیں ہوسکی۔

واقعے کے بعد پولیس نے علاقے میں سرچ آپریشن شروع کردیا۔ کارروائی کے دوران دہشتگردوں کا استعمال کردہ ایک دیسی ساختہ دھماکا خیز آلہ بھی برآمد ہوا، جسے بم ڈسپوزل عملے نے ناکارہ بنادیا۔ علاقے میں سکیورٹی مزید سخت کردی گئی ہے جبکہ فرار ہونے والے حملہ آوروں کی تلاش اور واقعے کی تحقیقات جاری ہیں۔