پشاور: سی ٹی ڈی کی کاروائی، جامع مسجد خدیجۃ الکبریٰ پر خودکش حملے کا مرکزی ملزم ہلاک

پشاور(ڈیلی اردو) خیبر پختونخوا کے شورش زدہ دارلحکومت پشاور میں محکمہ انسداد دہشتگردی اور سیکیورٹی فورسز کی مشترکہ کارروائی کے دوران داعش خراسان سے وابستہ 5 دہشتگرد ہلاک ہوگئے۔ حکام کے مطابق ہلاک ہونے والوں میں عمران عرف عبداللہ بھی شامل ہے، جسے اسلام آباد کے علاقے ترلائی میں جامع مسجد و امام بارگاہ خدیجۃ الکبریٰ پر خودکش حملے کے مقدمے میں مطلوب قرار دیا گیا تھا۔

محکمہ انسداد دہشتگردی کے مطابق کارروائی پشاور اور نوشہرہ کی سرحد کے قریب شمشتو کے علاقے میں خفیہ اطلاع کی بنیاد پر کی گئی۔ سیکیورٹی اہلکاروں نے ایک کمپاؤنڈ کو گھیرے میں لیا، جس کے بعد فائرنگ کا تبادلہ ہوا اور 5 مبینہ دہشتگرد ہلاک ہوگئے۔

حکام نے ہلاک افراد میں عمران عرف عبداللہ، بلال اور ابوبکر کی شناخت کا دعویٰ کیا ہے۔ ان میں عمران کو مختلف دہشتگردی کے مقدمات میں مطلوب بتایا گیا تھا۔ پاکستانی حکام کے مطابق اس کے خلاف اسلام آباد اور دیگر علاقوں میں دھماکوں، ٹارگٹ کلنگ اور دہشتگردی کی دیگر کارروائیوں سے متعلق تقریباً 20 مقدمات زیر تفتیش تھے۔

انسداد دہشتگردی حکام کے مطابق عمران پر 6 فروری کو اسلام آباد کے علاقے ترلائی میں حسینیہ خدیجۃ الکبریٰ پر ہونے والے خودکش حملے میں سہولت کاری کا الزام تھا۔ حکام کا دعویٰ ہے کہ اس نے مبینہ طور پر خودکش حملہ آور کے لیے دھماکا خیز جیکٹ باجوڑ سے حاصل کی اور حملہ آور کو نوشہرہ سے ترلائی منتقل کیا تھا۔ حملے میں متعدد افراد ہلاک اور تقریباً 169 زخمی ہوئے تھے۔

حکام کے مطابق کارروائی کے دوران ہلاک ہونے والے دہشتگرد مبینہ طور پر حساس تنصیبات، حسینیوں اور گرجا گھروں کو نشانہ بنانے کی منصوبہ بندی کر رہے تھے۔ جائے وقوعہ سے ایک سب مشین گن، 4 پستول، 2 دستی بم، 5 میگزین، ایک دیسی ساختہ بم اور دیگر گولہ بارود برآمد کرنے کا بھی دعویٰ کیا گیا ہے۔

سیکیورٹی حکام کا کہنا ہے کہ کارروائی کے بعد علاقے میں مزید سرچ آپریشن کیا گیا، جبکہ ہلاک دہشتگردوں کے نیٹ ورک اور ان کے ممکنہ سہولت کاروں سے متعلق تحقیقات جاری ہیں۔