پنجاب: خانیوال میں 4 سالہ بچی زیادتی کے بعد قتل

صوبہ پنجاب کے ضلع خانیوال میں چار سالہ بچی کو زیادتی کے بعد قتل کرکے لاش کھیتوں میں پھینک دی گئی۔

پولیس کے مطابق 4 سالہ بچی کو چار روز قبل گاؤں عزیزآباد سے اس وقت اغوا کیا گیا جب وہ گھر کے باہر دیگر بچوں کے ساتھ کھیل رہی تھی۔

پولیس کا کہنا ہےکہ بچی کو زیادتی کا نشانہ بنایا اور پھر قتل کرکے کھیتوں میں کھاد کے گٹے میں پھینک دیا گیا تھا، بچی کی لاش تحویل میں لے کر مزید کارروائی شروع کردی گئی ہے۔

دوسری جانب بچی کی لاش ملنے پر ورثا اور اہل علاقہ نے شدید احتجاج کرتے ہوئے جہانیاں روڈ بلاک کرکے ٹائر جلائے جب کہ کراچی سے آنے والی سرسید ایکسپریس کو بھی روک لیا۔

ورثا کا کہنا تھا کہ بچی کے لاپتا ہونے کی درخواست تھانہ کہنہ میں دی گئی تھی تاہم درخواست کے باوجود پولیس نے کوئی کارروائی نہیں کی، اگر پولیس کارروائی کرتی تو یہ واقعہ رونما نہیں ہوتا۔

آئی جی پنجاب نے ڈی پی او خانیوال سے رپورٹ طلب کر لی اور متعلقہ تھانہ کہنہ کے ایس ایچ او کو معطل کر دیا گیا ہے۔