پنجاب سے تحریک طالبان پاکستان اور داعش کے 9 دہشت گرد گرفتار، خودکش جیکٹس برآمد

اسلام آباد (ش ح ط) کاؤنٹر ٹیررازم ڈیپارٹمنٹ (سی ٹی ڈی) نے پنجاب بھر میں انٹیلی جنس بیسڈ آپریشن کرتے ہوئے مختلف کالعدم تنظیموں کے 9 دہشت گردوں گرفتار کر لیا۔

ترجمان سی ٹی ڈی کے مطابق یہ کارروائیاں پنجاب کے اضلاع گوجرانوالہ، لاہور، سرگودھا، ملتان، راولپنڈی میں کی گئی ہیں، گرفتار دہشت گردوں کے خلاف 7 مقدمات درج کر لیے گئے ہیں۔

سی ٹی ڈی کی جانب سے کارروائی کے دوران گرفتار کیے گئے دہشت گردوں میں محمد یعقوب، محمد بلال، محمد عارف، تحریک طالبان پاکستان (ٹی ٹی پی) سے امین فاروق، جبکہ داعش سے تعلق رکھنے والے فاروق احمد، محمد آصف شامل ہیں۔

ترجمان سی ٹی ڈی کا کہنا ہے کہ دہشت گرد اہم تنصیبات کو نشانہ بنانے کی منصوبہ بندی کر رہے تھے۔

ترجمان کا مزید کہنا ہے کہ گرفتار کیے گئے دہشت گروں کے قبضے ہینڈ گرنیڈ، دھماکہ خیز مواد، پرائمہ کارڈز، آئی ای ڈی بم، سیفٹی فیوز، بارودی مواد، اسلحہ، خودکش جیکٹس برآمد کی گئیں۔

ترجمان سی ٹی ڈی نے کہا ہے کہ ملزمان سے تفتیش جاری ہے، مزید اہم انکشافات متوقع ہیں۔

ترجمان سی ٹی ڈی کے مطابق تمام ملزمان کو نامعلوم مقام پر منتقل کردیا گیا ہے۔