چھتیس گڑھ کے کونڈا گاوں میں نکسلی ڈمپ سے 30 کلو دھماکہ خیز مواد اور پستول برآمد

کونڈا گاوں(ڈیلی اردو) بھارت کی ریاست چھتیس گڑھ کے ضلع کونڈا گاوں میں سکیورٹی فورسز نے مشترکہ کارروائی کے دوران 30 کلو گرام دھماکہ خیز مواد، 9 ایم ایم پستول اور دیگر مواصلاتی و دھماکہ خیز سامان برآمد کرلیا۔

پولیس کے مطابق کونڈا گاوں نکسل سیل، ڈسٹرکٹ ریزرو گارڈ (ڈی آر جی)، بستر فائٹرز اور بم ڈسپوزل اسکواڈ (بی ڈی ایس) کی مشترکہ ٹیم نے تھانہ مردہ پال کے علاقے میں گاوں کورمیل اور پسپال موکھاماری کے قریب جنگلات اور پہاڑی علاقے میں سرچ اور ڈی مائننگ آپریشن کیا۔

پولیس کا کہنا ہے کہ کارروائی ہتھیار ڈالنے والے نکسلیوں کی جانب سے فراہم کردہ معلومات کی بنیاد پر کی گئی۔ مشترکہ ٹیم نے علاقے میں تلاشی کے دوران نکسلیوں کی جانب سے چھپایا گیا ڈمپ برآمد کیا، جس میں 10 کلو گرام وزنی ٹفن آئی ای ڈی، 20 کلو گرام جلیٹن دھماکہ خیز مواد، 9 ایم ایم پستول اور دیگر سامان شامل تھا۔

پولیس کے مطابق برآمد ہونے والی ٹفن آئی ای ڈی کو بی ڈی ایس ٹیم نے حفاظتی نقطہ نظر سے موقع پر ہی ناکارہ بنا دیا، جبکہ دیگر سامان کو قبضے میں لے لیا گیا۔

کونڈا گاوں کے پولیس سپرنٹنڈنٹ پنکج چندرا نے کارروائی اور برآمدگی کی تصدیق کرتے ہوئے بتایا کہ نکسلیوں کی جانب سے جنگلاتی علاقوں میں چھپائے گئے ہتھیاروں، دھماکہ خیز مواد اور دیگر سازوسامان کی تلاش کے لیے سکیورٹی فورسز کی جانب سے مسلسل سرچ آپریشن جاری ہے۔

برآمد ہونے والے سامان میں 3 ٹفن بم شامل ہیں جن کا مجموعی وزن 10 کلو گرام، 160 جلیٹن اسٹکس جن کا مجموعی وزن 20 کلو گرام، ایک 9 ایم ایم پستول، ایک الیکٹرک ڈیٹونیٹر، 19 نان الیکٹرک ڈیٹونیٹر اور 40 کمرشل ڈیٹونیٹر شامل ہیں۔

اس کے علاوہ 6 واکی ٹاکی بمعہ اینٹینا اور چارجر، 6 ہیڈ فون، الیکٹرک وائر کے 4 بنڈل، ایک میٹر سیفٹی فیوز، تقریباً 5 میٹر سرخ کارڈیکس وائر، 33 انچ لمبا اور 9.5 انچ گولائی والا لوہے کا پائپ اور تقریباً 5 کلو گرام سبز پولی تھین بھی برآمد کی گئی۔

پولیس کے مطابق برآمد ہونے والے دھماکہ خیز مواد اور دیگر سامان کے حوالے سے مزید تفتیش جاری ہے۔