ڈیرہ اسماعیل خان میں انٹیلی جنس آپریشن، 8 دہشتگرد ہلاک

ڈیرہ اسماعیل خان(ڈیلی اردو) خیبرپختونخواہ کے شورش زدہ ضلع ڈیرہ اسماعیل خان میں سیکیورٹی فورسز نے خفیہ اطلاع پر انٹیلی جنس بیسڈ کارروائی کرتے ہوئے 8 دہشتگردوں کو ہلاک کردیا۔

سیکیورٹی ذرائع کے مطابق کارروائی دہشتگردوں کی موجودگی کی اطلاع ملنے کے بعد کی گئی، جس کے دوران 8 دہشتگرد مارے گئے۔ ذرائع کا کہنا ہے کہ ہلاک ہونے والوں میں تین اہم کمانڈر بھی شامل ہیں۔

کارروائی کے بعد دہشتگردوں کے قبضے سے غیر ملکی کرنسی، بھاری مقدار میں اسلحہ اور گولہ بارود بھی برآمد کیے جانے کی اطلاع ہے۔

صدر مملکت آصف علی زرداری اور وزیراعظم محمد شہباز شریف نے کارروائی پر سیکیورٹی فورسز کو خراج تحسین پیش کیا۔ وزیراعظم نے فورسز کے اہلکاروں کے عزم اور بہادری کو سراہتے ہوئے کہا کہ دہشتگردی کے خلاف جنگ میں پوری قوم سیکیورٹی فورسز کے ساتھ کھڑی ہے۔

وزیراعظم نے دہشتگردی کے مکمل خاتمے تک کارروائیاں جاری رکھنے کے عزم کا اظہار کرتے ہوئے کہا کہ ملک میں پائیدار امن اور استحکام کے لیے دہشتگردی کا خاتمہ ضروری ہے۔

سیکیورٹی فورسز کی جانب سے بھی عزمِ استحکام کے تحت دہشتگردی کے خاتمے اور ملک میں دیرپا امن کے قیام کے لیے انٹیلی جنس بنیادوں پر کارروائیاں جاری رکھنے کا عزم ظاہر کیا گیا ہے۔