ڈیرہ اسماعیل خان میں انٹیلی جنس بیسڈ آپریشن، ٹی ٹی پی کے 4 دہشتگرد ہلاک

ڈیرہ اسماعیل خان(ڈیلی اردو) خیبرپختونخوا کے شورش زدہ ضلع ڈیرہ اسماعیل خان میں سیکیورٹی فورسز نے انٹیلی جنس معلومات کی بنیاد پر کارروائی کرتے ہوئے ٹی ٹی پی سے تعلق رکھنے والے 4 دہشتگردوں کو ہلاک کردیا۔

سیکیورٹی ذرائع کے مطابق یہ کارروائی عزمِ استحکام کے تحت کی گئی، جس کے دوران فورسز نے دہشتگردوں کی نقل و حرکت کی نگرانی کے بعد ان کے خلاف آپریشن کیا۔ کارروائی میں چار دہشتگرد مارے گئے۔

ذرائع کا کہنا ہے کہ ہلاک دہشتگردوں کے قبضے سے بھاری مقدار میں اسلحہ، گولہ بارود اور افغانی کرنسی بھی برآمد ہوئی، جبکہ کارروائی کے بعد علاقے میں سیکیورٹی مزید سخت کردی گئی۔

سیکیورٹی فورسز کے مطابق ملک سے دہشتگردی کے خاتمے اور پائیدار امن کے قیام کے لیے انٹیلی جنس کی بنیاد پر کارروائیاں جاری رکھی جائیں گی۔