ڈیرہ اسماعیل خان میں دہشت گردوں کی فائرنگ، سی ٹی ڈی اہلکار شہید

ڈیرہ اسماعیل خان (سید توقیر حسین زیدی) ڈیرہ اسماعیل خان میں دہشت گردوں کی فائرنگ سے سی ٹی ڈی کا اہلکار شہید

تفصیلات کے مطابق خیبر پختونخوا کے ضلع ڈیرہ اسماعیل خان کے تھانہ سٹی کی حدود میں نجی سکول کے قریب گلی قریشیانوالی میں سی ٹی ڈی اہلکار محمد کامران کو موٹرسائیکل پر سوار دو دہشت گردوں نے فائرنگ کرکے شہید کردیا۔

واقعے کی اطلاع پر اے ایس پی سٹی ناصر محمود اور پولیس کی بھاری نفری موقع پر پہنچ گئی ۔پولیس ذرائع کے مطابق شہید سی ٹی ڈی اہلکار محمد کامران پر نامعلوم دہشت گردوں نے 9 ایم ایم پستول سے فائرنگ کی۔

سی ٹی ڈی پولیس نے اس واقعے کا مقدمہ دہشت گردی اور قتل کی دفعات کے تحت نامعلوم دہشت گردوں کے خلاف درج کرلیا ہے ۔

شہید اہلکار محمد کامران کی نمازجنازہ پولیس لائن میں ادا کی گئی جس میں اسٹیشن کمانڈر بریگیڈئیر رائوعمران سرتاج، ڈی آئی جی دارعلی خٹک اور ڈی پی او ڈیرہ نے شرکت کی۔

سی ٹی ڈی کے اہلکار پر حملے کی ذمہ داری کسی گروپ نے قبول نہیں کی ہے