ڈیرہ اسماعیل خان میں دہشتگردی کے دو واقعات، ایف بی آر کے 4 ملازمین اور ہائی وے پولیس اہلکار ہلاک

ڈیرہ اسماعیل خان(ڈیلی اردو) ڈیرہ اسماعیل خان میں دہشتگردی کے دو الگ الگ واقعات میں ایف بی آر کے چار ملازمین اور ہائی وے ٹریفک پولیس کا ایک اہلکار ہلاک جبکہ ایک پولیس اہلکار زخمی ہوگیا۔

پہلا واقعہ تھانہ شورکوٹ کی حدود میں مفتی محمود چوک کے قریب سعد اللہ ہوٹل کے سامنے پیش آیا، جہاں ہائی وے ٹریفک پولیس کی موبائل تھری ناکہ پر موجود تھی کہ نامعلوم دہشتگردوں نے اچانک فائرنگ کردی۔ فائرنگ کے نتیجے میں موبائل تھری کے 34 سالہ ڈرائیور حبیب ولد سبز علی مروت سکنہ شاہجہان شہید ٹاؤن ہلاک جبکہ ہیڈ کانسٹیبل محمد سبحان ولد گل رئیس زخمی ہوگئے، جنہیں فوری طور پر اسپتال منتقل کیا گیا۔ حبیب محکمہ پولیس کے سابق سپرنٹنڈنٹ سبز علی خان کے صاحبزادے تھے۔

واقعے کی اطلاع ملتے ہی پولیس کی بھاری نفری موقع پر پہنچ گئی اور شواہد اکٹھے کرکے تحقیقات شروع کردیں، تاہم حملہ آور فائرنگ کے بعد فرار ہوگئے۔

دوسرا واقعہ تھانہ گومل یونیورسٹی کی حدود میں قریشی موڑ، ابھایا پل کے قریب پیش آیا، جہاں نامعلوم دہشتگردوں نے دورانِ ڈیوٹی ایف بی آر کے اہلکاروں کو فائرنگ کا نشانہ بنایا۔ فائرنگ کے نتیجے میں ایف بی آر کے چار اہلکار ہلاک ہوگئے، جن میں دو مستقل جبکہ دو کنٹریکٹ ملازمین شامل تھے۔

ہلاک ہونے والے ایف بی آر اہلکاروں کی شناخت 29 سالہ وسیم ولد غلام یوسف لودھراں سکنہ بستی استرانہ جنوبی، 37 سالہ رحمت اللہ ولد میرباز خان سکنہ تترخیل لکی مروت، 25 سالہ سلمان الٰہی ولد الٰہی بخش سکنہ لانگ خیرشاہ اور محمد اویس ولد جہانگیر ڈولہ سکنہ بستی میہڑ ڈیال روڈ ڈیرہ اسماعیل خان کے نام سے ہوئی۔

دونوں واقعات کے بعد ڈیرہ اسماعیل خان شہر اور گردونواح میں سکیورٹی مزید سخت کردی گئی، جبکہ حملہ آوروں کی گرفتاری کے لیے پولیس اور سکیورٹی اداروں نے سرچ آپریشن شروع کردیا۔ بعد ازاں ہلاک ہونے والے اہلکاروں کی نماز جنازہ پولیس لائنز ڈیرہ اسماعیل خان میں سرکاری اعزاز کے ساتھ ادا کی گئی، جس میں اعلیٰ پولیس، سول اور عسکری حکام سمیت دیگر افراد نے شرکت کی۔