کابل : شیعہ کمیونٹی کی اعلیٰ کونسل کے دفتر کا طالبان فورسز کی جانب سے محاصرہ

کابل(ڈیلی اردو) افغانستان کے دارالحکومت کابل میں شیعہ کمیونٹی کی اعلیٰ کونسل کے دفتر کو طالبان کی وزارتِ عدلیہ سے وابستہ اہلکاروں کی جانب سے گھیرے میں لیے جانے کی اطلاعات سامنے آئی ہیں۔

رپورٹس کے مطابق وزارتِ عدلیہ سے وابستہ مسلح اہلکاروں نے دفتر کے اطراف سکیورٹی حصار قائم کیا، تاہم دفتر کی حفاظت پر مامور مسلح افراد نے بھی عمارت کے گرد پوزیشنیں سنبھال لیں اور وزارتِ عدلیہ کے اہلکاروں کو اندر داخل ہونے سے روک دیا۔

شیعہ کمیونٹی کی اعلیٰ کونسل افغانستان میں طالبان حکومت کے قیام کے بعد شیعہ برادری اور حکومت کے درمیان رابطے کے لیے قائم کی گئی تھی اور یہ ادارہ طالبان حکومت کے انتظامی ڈھانچے کے تحت کام کرتا ہے۔

دفتر کے محاصرے کی اطلاعات ایسے وقت میں سامنے آئی ہیں جب متعلقہ ادارہ خود طالبان حکومت کے تحت کام کر رہا ہے۔ اس صورتحال سے حکومتی ڈھانچے میں شامل مختلف اداروں کے درمیان ممکنہ اختلاف یا کشیدگی کے خدشات بھی پیدا ہوئے ہیں۔

تاہم طالبان حکام کی جانب سے تاحال دفتر کے محاصرے کی وجہ، وزارتِ عدلیہ کے اہلکاروں کو عمارت میں داخل ہونے کی ہدایت اور دونوں فریقوں کے درمیان ممکنہ تنازع سے متعلق کوئی باضابطہ وضاحت سامنے نہیں آئی۔