کراچی : بی ایل اے اور سندھو دیش انقلابی آرمی سے مبینہ تعلق کے الزام میں 4 دہشتگرد گرفتار

کراچی(ڈیلی اردو) کراچی میں محکمہ انسداد دہشتگردی (سی ٹی ڈی) نے وفاقی اور سول انٹیلی جنس اداروں کے تعاون سے مشترکہ کارروائیوں کے دوران کالعدم تنظیموں سے مبینہ تعلق رکھنے والے 4 افراد کو گرفتار کرلیا۔ سی ٹی ڈی کے مطابق گرفتار افراد میں سے 3 کا تعلق مبینہ طور پر بلوچ لبریشن آرمی (بی ایل اے) جبکہ ایک کا سندھو دیش انقلابی آرمی (ایس آر اے) سے ہے۔ کارروائیوں کے دوران 4 دستی بم اور ایک پستول بھی برآمد کیا گیا۔

سی ٹی ڈی حکام کا کہنا ہے کہ گرفتار افراد کراچی میں حساس تنصیبات اور قانون نافذ کرنے والے اداروں کو نشانہ بنانے کی منصوبہ بندی کر رہے تھے۔ حکام کے مطابق ایس آر اے سے مبینہ تعلق رکھنے والے گرفتار شخص کی ابتدائی تفتیش میں مختلف ممکنہ اہداف کی نگرانی کیے جانے کا انکشاف ہوا، جن میں ایک غیر ملکی شہری، پولیس افسر، ریلوے پٹڑی اور ایک سیاسی شخصیت کی رہائش گاہ شامل ہیں۔

سی ٹی ڈی کے مطابق گرفتار افراد کے خلاف مقدمات درج کرلیے گئے ہیں جبکہ ان کے مبینہ ساتھیوں، سہولت کاروں اور دیگر ممکنہ روابط کے حوالے سے تفتیش جاری ہے۔ برآمد ہونے والے اسلحے اور دستی بموں کو بھی تحقیقات کا حصہ بنایا گیا ہے۔ مشترکہ کارروائیوں میں حصہ لینے والے افسران اور اہلکاروں کے لیے تعریفی اسناد اور نقد انعامات کا اعلان بھی کیا گیا ہے۔