کراچی ایئرپورٹ خودکش حملہ کیس، ملزمان پر فردِ جرم عائد

کراچی (ڈیلی اردو) پاکستان کے صوبہ سندھ کی صوبائی حکومت نے کراچی میں اکتوبر 2024 کو ایئرپورٹ سگنل کے قریب ہونے والے خودکش حملے میں دہشت گردوں کی فنڈنگ سے متعلق کیس میں جیل حکام نے ملزم سعید کو انسداد دہشت گردی کی عدالت میں پیش کر دیا۔

ضمانت پر رہا شریک ملزم، نجی بینک کے منیجر بلال کو بھی عدالت میں پیش کیا گیا۔ عدالت نے دونوں ملزمان پر فردِ جرم عائد کی تاہم ملزمان نے صحتِ جرم سے انکار کر دیا۔

عدالت نے کیس کے گواہوں کو 10 جنوری کو طلب کرنے کے لیے نوٹس جاری کر دیے۔

پراسیکیوشن کے مطابق ملزمان پر خودکش حملے میں استعمال ہونے والی گاڑی کی خریداری اور ایئرپورٹ بم دھماکے میں دہشت گردوں کی مالی معاونت کا الزام ہے۔

واضح رہے کہ عدالت کیس میں مفرور ملزمان کو اشتہاری قرار دینے کی کارروائی کا حکم بھی دے چکی ہے، جبکہ کالعدم بلوچ لبریشن آرمی (بی ایل اے) سے تعلق رکھنے والے بشیر زیب اور گل رحمان کو مفرور قرار دیا گیا ہے۔

ایف آئی آر کے مطابق اتوار کی شب کراچی ایئرپورٹ کے قریب ہونے والے خودکش حملے میں دو چینی شہری ہلاک جبکہ ایک چینی باشندے سمیت 11 افراد زخمی ہوئے تھے۔ زخمیوں میں سکیورٹی فورسز کے اہلکار بھی شامل تھے جو چینی وفد کی سکیورٹی پر مامور تھے۔

اس خودکش حملے کی ذمہ داری کالعدم بلوچ عسکریت پسند تنظیم بلوچ لبریشن آرمی (بی ایل اے) نے قبول کی تھی۔ تنظیم کے بیان کے مطابق حملہ مجید بریگیڈ سے تعلق رکھنے والے شاہ فہد بلوچ عرف آفتاب نے کیا۔