کراچی میں سی ٹی ڈی کا آپریشن، لشکر جھنگوی کے دو انتہائی مطلوب دہشت گرد گرفتار

کراچی (ڈیلی اردو) پاکستان کے صوبہ سندھ کے دارالحکومت کراچی میں کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاعات کی بنیاد پر کارروائی کرتے ہوئے کالعدم لشکر جھنگوی عطاالرحمٰن عرف نعیم بخاری گروپ سے تعلق رکھنے والے دو دہشت گردوں کو گرفتار کر لیا۔

سی ٹی ڈی ترجمان کے مطابق گرفتار دہشت گرد کراچی میں آئی ای ڈی دھماکوں اور ٹارگٹ کلنگ کی کارروائیوں میں مطلوب تھے۔ گرفتار افراد کی شناخت محمد جمیل انصاری عرف شعیب عرف چاچا اور حماد انصاری عرف ضرار عرف ببلو کے نام سے ہوئی ہے۔

ترجمان کے مطابق دونوں دہشت گرد سی ٹی ڈی کی ریڈ بک ایڈیشن نمبر 10 میں انتہائی مطلوب فہرست میں شامل تھے اور 2015 اور 2016 سے روپوش تھے۔ حکام کا کہنا ہے کہ وہ کراچی میں دوبارہ سلیپر سیل منظم کرنے کے لیے نیٹ ورک قائم کر رہے تھے۔

سی ٹی ڈی کے مطابق محمد جمیل انصاری عرف شعیب عرف چاچا کالعدم لشکر جھنگوی نعیم بخاری گروپ کا اہم رکن اور نعیم بخاری کا قریبی ساتھی ہے، جس نے افغانستان سے آئی ای ڈی بم اور سرکٹ بنانے کی تربیت حاصل کی تھی۔

ترجمان کے مطابق گرفتار دہشت گرد مختلف دہشت گرد کارروائیوں کے لیے سہولت کاری کرتا تھا جبکہ نعیم بخاری کی گرفتاری کے بعد روپوش ہو گیا تھا۔

سی ٹی ڈی کے مطابق دوسرا گرفتار دہشت گرد حماد علی انصاری عرف ضرار عرف ببلو، کالعدم تنظیم کے دیگر اہم ارکان دلدار عرف چاچا، عمران بھٹی، اسحاق بوبی اور عاصم کیپری کا قریبی ساتھی رہا ہے۔

ترجمان نے بتایا کہ گرفتار دہشت گرد کراچی میں ہونے والے متعدد حملوں کے مقدمات میں مطلوب تھے، جن میں 2013 میں کورنگی میں رینجرز موبائل پر آئی ای ڈی حملہ، 2014 میں کراچی ایئرپورٹ حملہ اور 2015 میں ریپڈ رسپانس فورس (آر آر ایف) کے ٹرک پر آئی ای ڈی حملہ شامل ہیں۔

سی ٹی ڈی کے مطابق نعیم بخاری گروپ سرکاری افسران و اہلکاروں اور شیعہ برادری کی ٹارگٹ کلنگ میں بھی ملوث رہا ہے۔ ترجمان نے دعویٰ کیا کہ گروپ نے کراچی میں فرقہ وارانہ حملوں کی منصوبہ بندی اور کارروائیوں میں کردار ادا کیا۔

سی ٹی ڈی پولیس کے مطابق گرفتار دہشت گردوں کے قبضے سے بارودی مواد کے چار سلیب، پانچ ڈیٹونیٹر، 10 میٹر پرائما کارڈ، ریموٹ کنٹرول ڈیوائسز اور پانچ پستول برآمد کیے گئے ہیں۔

ترجمان کے مطابق گرفتار افراد کے خلاف انسداد دہشت گردی کی دفعات سمیت دیگر دفعات کے تحت دو مقدمات درج کر لیے گئے ہیں، جبکہ ان سے مزید تفتیش جاری ہے۔ سی ٹی ڈی نے دیگر ساتھیوں کی گرفتاری کے لیے کارروائیاں شروع کر دی ہیں۔