کراچی: چہلم امام حسینؑ کے جلوس اور مجالس کا سیکیورٹی پلان تشکیل دیدیا گیا

کراچی (ڈیلی اردو) کراچی سمیت ملک بھر میں چہلم امام حسین علیہ السلام کے موقع پر سیکیورٹی کے سخت انتظامات کیے گئے جبکہ مختلف شہروں میں موبائل فون سروسز بھی بند رہیں گی۔

کراچی میں چہلم کی مناسبت سے مرکزی جلوس ایم اے جناح روڈ پر نمائش چورنگی سے شروع ہوکر ٹاور پر اختتام پذیر ہوگا۔

ایم اے جناح روڈ کو مکمل طور پر کنٹینرز لگا کر سیل کردیا گیا ہے جبکہ جلوس کے راستے میں آنے والی دکانوں کو بھی مکمل طور پر تلاشی لیے جانے کے بعد ایک روز قبل ہی بند کردیا گیا ہے۔

جلوس کے راستوں پر سیکیورٹی انتہائی سخت کردی گئی ہے جبکہ موبائل فون جیمرز اور سراغ رساں کتوں کو بھی استعمال کیا جارہا ہے۔

شہر کے مختلف علاقوں میں تقریبا 18 ہزار رینجرز اور پولیس اہلکاورں کو تعینات کیا گیا ہے جبکہ سیکڑوں سی سی ٹی وی کیمروں سے جلوس کی نگرانی بھی کی جارہی ہے۔

اطلاعات کے مطابق تقریباً 100 چھوٹے جلوس شہر کے مختلف علاقوں میں نکالے جارہے ہیں جبکہ 460 کے قریب مجالس عزا کا انعقاد کیا جارہا ہے۔

سندھ بھر میں چہلم امام حسین علیہ السلام کی مناسب سے نکالے جانے والے جلوسوں کی حفاظت کے لیے مجموعی طور پر 46 ہزار سے زائد سیکیورٹی اہلکاروں کو تعینات کیا گیا ہے۔

حضرت امام حسین علیہ السلام کے چہلم پر سندھ بھر میں دفعہ 144 نافذ کردی گئی اور اس دوران موٹر سائیکل کی ڈبل سوار پر بھی پابندی ہوگی۔

محکمہ داخلہ سندھ کی جانب سے جاری اعلامیے کے مطابق 20 اکتوبر کو چہلم حضرت امام حسین علیہ السلام کے موقع پر سندھ بھر میں دفعہ 144 کا نفاذ ہو گا۔

چہلم کے موقع پر اسلحے کی نمائش پر بھی پابندی عائد کی گئی ہے جب کہ 5 اور زائد افراد کے اجتماع اور نفرت آمیز تقاریر پر بھی پابندی ہوگی۔