کرم میں انٹیلی جنس بنیاد پر کارروائی، افغان شہری سمیت 4 دہشتگرد ہلاک

کرم (ڈیلی اردو)خیبرپختونخواہ کے شورش زدہ قبائلی ضلع کرم میں سیکیورٹی فورسز نے خفیہ اطلاعات کی بنیاد پر کارروائی کرتے ہوئے چار دہشتگردوں کو ہلاک کرنے کا دعویٰ کیا ہے، جن میں ایک افغان شہری بھی شامل ہے۔

سیکیورٹی ذرائع کے مطابق کارروائی 8 ستمبر کو دہشتگردوں کی موجودگی سے متعلق موصول ہونے والی قابلِ عمل انٹیلی جنس کی بنیاد پر کی گئی۔ آپریشن کے دوران دہشتگردوں کے ٹھکانے کو نشانہ بنایا گیا، جس کے نتیجے میں چار مسلح افراد ہلاک ہوئے۔

ذرائع کے مطابق ہلاک ہونے والوں میں عبیداللہ سعد ولد غلام غوث صالحی بھی شامل ہے، جسے افغانستان کے صوبہ لوگر کے علاقے شاہ قلعہ کا رہائشی افغان شہری بتایا گیا ہے۔ سیکیورٹی ذرائع کا کہنا ہے کہ مذکورہ شخص پاکستان میں دہشتگردی کی مختلف کارروائیوں میں ملوث تھا۔

سیکیورٹی حکام کے مطابق دہشتگردوں اور ان کے سہولت کاروں کے خلاف کارروائیاں انٹیلی جنس معلومات کی بنیاد پر جاری ہیں تاکہ حساس علاقوں میں تخریبی سرگرمیوں اور ممکنہ حملوں کو بروقت روکا جا سکے۔

ذرائع کا کہنا ہے کہ افغانستان سے ہونے والی مبینہ دراندازی اور سرحد پار موجود مسلح گروہوں کی سرگرمیاں سیکیورٹی کے لیے ایک اہم چیلنج ہیں، جس کے پیش نظر سرحدی اور حساس علاقوں میں نگرانی اور سیکیورٹی اقدامات مزید مؤثر بنائے گئے ہیں۔

سیکیورٹی فورسز نے واضح کیا ہے کہ ملک میں امن و امان کو نقصان پہنچانے والے مسلح عناصر کے خلاف کارروائیاں قانون کے مطابق جاری رکھی جائیں گی۔ حکام کے مطابق شہریوں کے تحفظ اور دہشتگردی کی روک تھام کے لیے انٹیلی جنس کی بنیاد پر آپریشنز کا سلسلہ برقرار رہے گا۔

کرم میں ہونے والی کارروائی کو سیکیورٹی فورسز کی جانب سے دہشتگردی کے نیٹ ورک کے خلاف ایک اہم پیش رفت قرار دیا جا رہا ہے۔