کرک میں زہریلے کھانے سے 14 پاکستانی طالبان ہلاک، افغان شہری بھی شامل

 کرک  (نمائندہ ڈیلی اردو)  پاکستان کے شورش زدہ صوبہ خیبر پختونخوا کے ضلع کرک کے علاقے بانڈہ داود شاہ میں زہریلا کھانا کھانے سے 14 دہشتگردوں کے ہلاک ہونے کی تصدیق سامنے آئی ہے۔

مقامی ذرائع کے مطابق ہلاک ہونے والوں میں 13 کا تعلق یونین کونسل بہادر خیل سے ہے جبکہ ایک افغان شہری بھی شامل ہے۔ واقعہ اس وقت پیش آیا جب دہشتگردوں نے زبردستی ایک مقامی گھرانے سے کھانا مانگا۔ اہلِخانہ نے غصے میں کھانے میں زہر ملا دیا۔ زہریلا کھانا کھانے کے بعد دہشتگرد شدید تکلیف میں مبتلا ہوگئے اور انہیں خرم کے ایک مقامی حکیم کے پاس لے جایا گیا لیکن وہ جانبر نہ ہو سکے۔

مقامی  ذرائع کے مطابق ہلاک ہونے والے دہشتگرد کمانڈر کلیم وزیر گروپ سے تعلق رکھتے تھے۔ ان کی لاشیں بعدازاں سید ولی نامی شخص کے حجرے میں رکھی گئیں جو دہشتگردوں کا ٹھکانا تھا۔ سید ولی بھی انہی میں شامل تھا جو زہر آلود کھانے سے ہلاک ہوا۔

اگرچہ کالعدم تحریک طالبان پاکستان (ٹی ٹی پی) نے ان ہلاکتوں کی سختی سے تردید کی ہے، تاہم مقامی سطح پر ان کی موت کی تصدیق کی جا رہی ہے۔ کمانڈر کلیم وزیر کی ہلاکت کے بارے میں حتمی طور پر کچھ نہیں کہا جا سکا۔