کوہاٹ پولیس لائنز خودکش حملے کی تحقیقات میں اہم پیش رفت، لکی مروت میں مبینہ سہولت کار کمانڈر ہلاک

لکی مروت(ڈیلی اردو) خیبرپختونخواہ کے شورش زدہ ضلع لکی مروت میں سکیورٹی فورسز اور محکمہ انسداد دہشتگردی (سی ٹی ڈی) کی مشترکہ انٹیلی جنس بنیاد پر کارروائی کے دوران دہشتگرد تنظیم سے وابستہ اہم کمانڈر زاہد گل ہلاک ہوگیا۔ سکیورٹی ذرائع کے مطابق وہ کوہاٹ پولیس لائنز پر خودکش حملے کی منصوبہ بندی اور اس میں سہولت کاری میں مبینہ طور پر ملوث تھا۔

رپورٹ کے مطابق خفیہ اطلاعات کی بنیاد پر ضلع لکی مروت کے ایک علاقے میں کارروائی کی گئی۔ زاہد گل کو کوہاٹ پولیس لائنز حملے کے علاوہ دیگر دہشتگرد حملوں اور مختلف جرائم کے مقدمات میں بھی مطلوب بتایا گیا ہے۔

ذرائع کے مطابق زاہد گل کی ہلاکت سے کوہاٹ پولیس لائنز حملے میں ملوث نیٹ ورک اور اس کے سہولت کاروں کے بارے میں مزید معلومات حاصل کرنے میں مدد ملنے کی توقع ہے۔ تاہم، کارروائی کے دوران کسی اسلحے یا دیگر سامان کی برآمدگی سے متعلق تفصیلات سامنے نہیں آئیں۔

جنوبی خیبر پختونخوا میں پولیس اور سکیورٹی تنصیبات کو نشانہ بنانے والے دہشتگرد نیٹ ورکس کے خلاف کارروائیاں جاری ہیں۔ حکام کی جانب سے آپریشن سے متعلق مزید تفصیلات تاحال جاری نہیں کی گئیں۔