کیچ میں سیکیورٹی فورسز کا انٹیلیجنس بیسڈ آپریشن، 4 دہشتگرد ہلاک

کوئٹہ(ڈیلی اردو) بلوچستان کے شورش زدہ ضلع کیچ کے علاقے پروم میں سیکیورٹی فورسز نے انٹیلیجنس اطلاعات کی بنیاد پر کارروائی کرتے ہوئے مبینہ طور پر ایک مسلح گروپ کے چار دہشتگردوں کو ہلاک کردیا۔

سیکیورٹی ذرائع کے مطابق کارروائی افغانِ کوہ کے علاقے میں کی گئی، جہاں ایک مشتبہ گروپ کی موجودگی کی اطلاع موصول ہوئی تھی۔ ذرائع کا کہنا ہے کہ گروپ کی قیادت مبینہ طور پر مرتضیٰ عرف ڈاکٹر کر رہا تھا۔

ذرائع کے مطابق فورسز نے دو موٹر سائیکلوں پر سوار چار مشتبہ افراد کو روکنے کی کوشش کی تو انہوں نے فائرنگ شروع کردی اور فرار ہونے کی کوشش کی۔ اس دوران فورسز اور مسلح افراد کے درمیان فائرنگ کا تبادلہ ہوا، جس کے نتیجے میں چاروں افراد ہلاک ہوگئے۔

سیکیورٹی ذرائع کا کہنا ہے کہ کارروائی کے بعد علاقے میں نگرانی مزید سخت کردی گئی ہے اور ممکنہ سہولت کاروں اور دیگر مشتبہ افراد کی تلاش کے لیے کارروائیاں جاری ہیں۔

حکام کے مطابق بلوچستان سمیت ملک کے مختلف علاقوں میں دہشتگرد عناصر کے خلاف انٹیلیجنس بنیادوں پر آپریشنز کا سلسلہ جاری ہے، جن کا مقصد مسلح گروہوں کی نقل و حرکت روکنے اور ان کے ممکنہ نیٹ ورک کا سراغ لگانا ہے۔