ہرات : نوجوان کو مبینہ تشدد کے بعد طالبان نے گولیاں مار کر ہلاک کردیا

ہرات(ڈیلی اردو) افغانستان کے شہر ہرات میں ایک 30 سالہ نوجوان کو مبینہ طور پر تشدد اور مارپیٹ کے بعد ہاتھ باندھ کر گولیاں مار کر ہلاک کیے جانے کا دعویٰ سامنے آیا ہے۔

افغان میڈیا رپورٹ کے مطابق مقامی ذرائع نے ایک ویڈیو فراہم کی ہے جس میں ایک نوجوان کو مبینہ تشدد کا نشانہ بنانے کے بعد ہاتھ بندھے ہوئے دکھایا گیا ہے، جس کے بعد اسے فائرنگ کرکے ہلاک کیا جاتا ہے۔ ذرائع نے مقتول کی شناخت عبدالقدیر پہلوان زادہ کے نام سے کی ہے۔

رپورٹ کے مطابق واقعہ گزشتہ جمعے کی شام ہرات شہر کے چوتھے پولیس ضلع میں ایک پٹرول پمپ کے قریب پیش آیا۔ مقامی ذرائع کا دعویٰ ہے کہ عبدالقدیر موٹر سائیکل پر وہاں پہنچا تھا جہاں مبینہ طور پر طالبان سے وابستہ مسلح افراد نے اسے قابو کیا۔

ذرائع کے مطابق واقعے کے دوران پشتون زرغون میں طالبان کے پولیس کمانڈر سید احمد محمدی، ان کے بھائی اور بہنوئی بھی موجود تھے۔ رپورٹ میں دعویٰ کیا گیا ہے کہ ایک شخص نے نوجوان کو مبینہ طور پر بندوق کے بٹ سے تشدد کا نشانہ بنایا، جبکہ دوسرے شخص نے اسے گولی ماری۔

مقتول کے اہل خانہ کے مطابق عبدالقدیر ہرات میں ویلڈنگ کا کام کرتا تھا اور کسی سیاسی یا مسلح گروپ سے وابستہ نہیں تھا۔ خاندان کا کہنا ہے کہ اس کا کوئی سابقہ فوجی پس منظر بھی نہیں تھا اور طالبان نے اس سے قبل اسے گرفتار نہیں کیا تھا۔

رپورٹ کے مطابق مقتول کی والدہ نے طالبان کی اعلیٰ قیادت سے اپنے بیٹے کے قتل کی تحقیقات اور ذمہ داروں کے خلاف کارروائی کا مطالبہ کیا ہے۔ خاندان کا الزام ہے کہ انہیں معاملے کی پیروی سے روکنے کے لیے دباؤ کا سامنا ہے۔

اب تک طالبان کی جانب سے عبدالقدیر پر کسی جرم یا الزام کی باضابطہ وضاحت سامنے نہیں آئی۔ افغان میڈیا کے مطابق واقعے کی مکمل تفصیلات اور ویڈیو میں موجود افراد کے بارے میں آزادانہ طور پر تصدیق بھی نہیں ہوسکی۔

رپورٹ میں مزید کہا گیا ہے کہ اس سے قبل پنجشیر، اندراب اور بدخشان سے بھی ایسی ویڈیوز سامنے آچکی ہیں جن میں طالبان پر افراد کو ہاتھ باندھ کر قتل کرنے کے الزامات عائد کیے گئے تھے۔ اقوام متحدہ کے افغانستان مشن نے بھی ماضی کی رپورٹس میں ماورائے عدالت قتل، جبری گمشدگیوں، من مانی گرفتاریوں اور تشدد کے واقعات کا ذکر کیا ہے۔