ہرات میں طالبان پولیس ہیڈکوارٹر کے قریب فائرنگ، ایک شخص ہلاک

کابل (ڈیلی اردو) افغانستان کے صوبہ ہرات میں طالبان پولیس کمانڈ کے مرکزی دفتر کے قریب نامعلوم مسلح افراد نے فائرنگ کرکے ایک شخص کو ہلاک کردیا۔

مقامی ذرائع کے مطابق واقعہ پیر کے روز اس وقت پیش آیا جب نعمان نامی شخص طالبان کی پولیس کمانڈ کے داخلی دروازے کے قریب سے گزر رہا تھا۔ حملہ آوروں نے اسے نشانہ بنایا اور موقع سے فرار ہوگئے۔

ذرائع کا کہنا ہے کہ مقتول نعمان، ہرات کی سابق صوبائی کونسل کے رکن عبدالرحمن مرادی کا بیٹا تھا۔

یہ واقعہ ایک ایسے وقت میں پیش آیا ہے جب کابل سے متعلق ذرائع نے دشتِ برچی میں چار ہزارہ نوجوانوں کی ہلاکت کا دعویٰ بھی کیا ہے۔ طالبان کی جانب سے ان افراد کو مسلح چور قرار دیا گیا تھا۔

مقامی ذرائع کے مطابق حالیہ واقعات نے افغانستان میں امن و امان کی صورتحال اور جرائم کی روک تھام کے حوالے سے ایک بار پھر سوالات اٹھا دیے ہیں۔