ہنگو میں سیکیورٹی فورسز کی کارروائی، 8 دہشتگرد اور 6 اہلکار ہلاک

ہنگو(ڈیلی اردو) خیبرپختونخوا کے شورش زدہ ضلع ہنگو میں سیکیورٹی فورسز اور دہشتگردوں کے درمیان فائرنگ کے تبادلے میں 8 دہشتگرد ہلاک ہوگئے، جبکہ کارروائی کے دوران پاک فوج کے 2 افسران سمیت 6 اہلکار جان کی بازی ہار گئے۔

پاک فوج کے شعبہ تعلقات عامہ (آئی ایس پی آر) کے مطابق 20 ستمبر کو ہنگو کے علاقے میں سیکیورٹی فورسز کے دستوں اور دہشتگردوں کے درمیان شدید فائرنگ کا تبادلہ ہوا۔ سیکیورٹی اہلکاروں نے مؤثر کارروائی کرتے ہوئے 8 دہشتگردوں کو ہلاک کردیا۔

آئی ایس پی آر کے مطابق کارروائی کے دوران دستوں کی قیادت کرنے والے دو افسران بھی ہلاک ہوئے۔ ان میں 23 سالہ کیپٹن ابوذر فاروق اور 22 سالہ لیفٹیننٹ شیراز بابر شامل ہیں، جبکہ 4 دیگر فوجی اہلکار بھی فائرنگ کے تبادلے میں ہلاک ہوئے۔

سیکیورٹی فورسز کی جانب سے علاقے میں موجود دیگر دہشتگردوں کی تلاش اور کلیئرنس کے لیے کارروائی جاری رکھنے کی اطلاع دی گئی ہے۔ آئی ایس پی آر کے مطابق ملک میں دہشتگردی کے خاتمے اور امن و امان کے قیام کے لیے سیکیورٹی فورسز اور قانون نافذ کرنے والے اداروں کی کارروائیاں جاری رہیں گی۔

وزیراعظم شہباز شریف نے ہنگو میں کارروائی کے دوران 8 دہشتگردوں کی ہلاکت پر سیکیورٹی فورسز کو خراج تحسین پیش کیا اور کیپٹن ابوذر فاروق، لیفٹیننٹ شیراز بابر سمیت 6 اہلکاروں کی ہلاکت پر افسوس کا اظہار کیا۔

وزیراعظم نے کہا کہ سیکیورٹی اہلکاروں نے ملک کے دفاع اور دہشتگردی کے خلاف کارروائیوں کے دوران جانیں قربان کیں۔ انہوں نے متاثرہ اہلکاروں کے اہل خانہ سے تعزیت کرتے ہوئے صبر کی دعا کی اور کہا کہ دہشتگردی کے خلاف کارروائیاں جاری رکھی جائیں گی۔