یمن: تعز کے داخلی راستے پر حوثی باغیوں کا حملہ پسپا، باب المندب میں جھڑپیں شدت اختیار کرگئیں

صنعاء(ڈیلی اردو) یمن کے شہر تعز کے جنوبی داخلی راستے وادی الضباب پر حکومتی فورسز نے حوثی باغیوں کا حملہ ناکام بناتے ہوئے انہیں پیچھے ہٹنے پر مجبور کردیا۔ اسکائی نیوز عربیہ کے مطابق یہ جھڑپیں ایسے وقت میں ہوئیں جب ملک کے مختلف علاقوں میں کئی ہفتوں سے لڑائی جاری ہے۔

یمنی ذرائع کے مطابق تعز کے جنوب اور مغرب میں جبل صبر اور نجد قسیم کے محاذوں پر بھی بھاری ہتھیاروں سے فائرنگ کا تبادلہ جاری ہے۔ اسی دوران تعز کی مرکزی جیل میں قیدیوں کی جانب سے اندرونی دروازے کھولنے کے بعد ہنگامہ آرائی کی کوشش کی گئی، جسے سکیورٹی فورسز نے ناکام بنا دیا۔

دوسری جانب باب المندب کے علاقے میں جنوبی العمالقہ بریگیڈز اور حوثی باغیوں کے درمیان مسلسل دوسرے روز بھی شدید جھڑپیں جاری رہیں۔ یمنی فوجی ذرائع کے مطابق العمالقہ فورسز نے معسكر العرضی کے اطراف دو مختلف سمتوں سے پیش قدمی کی، جبکہ لڑائی کے دوران دونوں جانب درجنوں افراد کے ہلاک اور زخمی ہونے کی اطلاعات ہیں۔

رپورٹ کے مطابق حالیہ دنوں میں یمن میں لڑائی میں شدت آئی ہے اور حکومتی فورسز نے حوثی باغیوں کے قبضے میں جانے والے علاقوں کو واپس لینے کے لیے جوابی کارروائیاں شروع کر رکھی ہیں۔ سعودی عرب بھی اس کارروائی میں فضائی حملوں کے ذریعے حصہ لے رہا ہے۔ اسی ہفتے سعودی عرب میں ہوائی اڈوں کو نشانہ بنانے والے حوثی حملوں کے نتیجے میں چھ افراد کی ہلاکت کی اطلاعات بھی سامنے آئی تھیں۔