آبنائے ہرمز کھلی رہیگی، ایران پر پابندیوں میں نرمی خارج از امکان، امریکی صدر ٹرمپ

واشنگٹن (نمائندہ ڈیلی اردو) امریکی صدر ڈونلڈ ٹرمپ نے کہا ہے کہ آبنائے ہرمز ’’سب کے لیے کھلی‘‘ ہوگی اور اسے کوئی ملک مکمل طور پر کنٹرول نہیں کر سکے گا۔

امریکی کابینہ کے اجلاس سے خطاب کرتے ہوئے صدر ٹرمپ نے کہا کہ امریکہ اس راستے کی نگرانی کرے گا لیکن اسے کسی کے کنٹرول میں نہیں جانے دیا جائے گا۔ ان کے مطابق یہ معاملہ ان مذاکرات کا حصہ ہے جو اس وقت جاری ہیں۔

ایرانی پابندیوں سے متعلق سوال پر صدر ٹرمپ نے واضح کیا کہ اس وقت ایران پر عائد پابندیوں میں نرمی یا مالی ریلیف پر کوئی بات نہیں ہو رہی۔ ان کا کہنا تھا کہ ’’نہ پابندیاں ہٹائی جا رہی ہیں اور نہ ہی کوئی رقم دی جا رہی ہے‘‘۔

انہوں نے مزید کہا کہ امریکہ کے پاس ایران سے متعلق منجمد رقوم پر کنٹرول موجود ہے اور جب تک ایران کا رویہ درست نہیں ہوتا یہ کنٹرول برقرار رکھا جائے گا۔ ٹرمپ کے مطابق بہتر رویے کی صورت میں ہی ان رقوم تک رسائی دی جائے گی۔

صدر ٹرمپ نے ایک بار پھر ایران کے جوہری پروگرام پر سخت مؤقف اپناتے ہوئے کہا کہ تہران کو کسی صورت جوہری ہتھیار حاصل کرنے کی اجازت نہیں دی جا سکتی۔ ان کے مطابق موجودہ صورتحال میں ایران معاہدے کی طرف بڑھنا چاہتا ہے لیکن بات چیت ابھی مکمل نہیں ہوئی۔

انہوں نے کہا کہ ایران کے ساتھ مذاکرات جاری ہیں لیکن ابھی تک پیش رفت سے اطمینان نہیں ہوا، تاہم امید ہے کہ معاہدہ ممکن ہو سکتا ہے۔

اس موقع پر امریکی وزیر خارجہ مارکو روبیو نے بھی کہا کہ ایران کو کبھی بھی جوہری ہتھیار حاصل نہیں کرنے دیے جائیں گے۔ 

ان کے مطابق امریکہ کی ترجیح سفارتکاری اور مذاکرات ہیں، تاہم اگر یہ راستہ ناکام ہوا تو دیگر آپشنز بھی موجود ہیں۔